Caspar Baader

Dr Caspar Baader isch am 1. Oktober 1953 z Basel uf d Wält cho. Är isch schtudierte Buur, Rächtsaawalt und e Schwyzer Politiker vo dr SVP.

Schuele, Schtudium

Nodem dr Caspar Baader z Gälterchinde d Primar- und Realschuel (hütigi Sekundarschuel) bsuecht gha het, isch är bis 1972 ins Gymnasium z Lieschtel gange. Drno het är an dr ETH Züri Agronomy schtudiert (bis 1977) und an dr Uni-Basel Rächtswüsseschaft (1982). Drü Joor spöter het är im Baselbiet s Aawaltspatänt gmacht.

Syni Titel si: lic. iur. und dipl. Ing.-Agr. ETH. Dr Caspar Baader isch hüte selbschtändige Rächtsaawalt mit ere Aawaltspraxis z Gälterchinde.

Politik

Der Caspar Baader isch vo 1983 bis 1986 Mitglyd vom Gmeinrot Bannwil (BE) gsi; vo 1988 bis 1998 Mitglyd vom Bürgerrot Gälterchinde; vo 1991 bis 1999 Mitglyd und Presidänt vo dr Kreissekundarschuel Gälterchinde; vo 1992 bis 1994 Mitglyd vo dr Schtüürrekurskommission vom Kanton Basel-Landschaft; sit 1994 Presidänt vo dr Abteilig Schtüürgricht vom Kanton Basel-Landschaft.

Im Joor 1998 isch dr Caspar Baader für e Hansrudolf Nebiker in Nazionalrot nogrütscht und vertritt sither dr Kanton Basel-Land in Bärn. Är het meereri Verwaltigsrotsmandat [1] , isch in einige Kommissione und Delegazione und zuedem no Presidänt vo dr SVP-Bundeshuusfrakzion.

Militär

Im Militär isch dr Caspar Baader Oberscht.

Familie

Dr Caspar Baader isch verhürotet und Vater vo drei erwachsene Süün. Är woont z Gälterchinde.

Weblinks

• Dr persönlichi Netzuftritt
• D Biografi vom Caspar Baader uf dr Website vo dr Bundesversammlig

Dä Artikel basiert uff ere fräie Übersetzig vum Artikel „[[:{{{1}}}:{{{2}}}|{{{2}}}]]“ vu {{{1}}}.wikipedia.org. E Liste vu de Autore un Versione isch do z finde.