London Hilton on Park Lane
London Hilton on Park Lane zo ul leti e Park Lane, a-us Hyde Park e distrikt Mayfair e Londrez.
Ur skraber-oabl eo, 101 m (331 ft) dezhañ, 28 estaj ha 453 c'hambr, 56 anezho o vezañ kambreier ton. Ur preti enoret gant ar Michelin, Galvin at Windows, zo e penn uhelañ ar savadur.
Gant ar savour stadunanat William B. Tabler (1914-2004), ur savour hag a labouras kalz evit sevel letioù Hilton, e voe treset. War lec'h istorel al Londonderry House eo bet savet London Hilton on Park Lane.
Evel London Hilton e voe digoret al leti d'ar 17 a viz Ebrel 1963.
Eno e kejas ar Beatles ouzh Maharishi Mahesh Yogi d'ar 24 a viz Eost 1967. Goude-se e oant bet en Uttar Pradesh gantañ evit prederiata.
D'ar 5 a viz Gwengolo 1975 e voe bombezet al London Hilton gant an IRA. Daou zen a varvas, ha 63 a voe gloazet.
E-pad ar bloavezhioù 1990, ar Pools Panel (pennoù uhel ar vell-droad saoz) a geje bep Sadorn el leti.
Un eil bombezadenn a voe d'ar 7 a viz Gwengolo 1992, met ne voe nemet un tammig distruj.
Un tan-gwall a voe d'ar 1añ a viz Gouhere 2011 el leti. Ne voe den ebet gloazet pe lazhet. Un nebeud estajoù nemetken a oa bet tizhet.
D'ar 15 a viz Genver 2018, Dolores O'Riordan, anezhi kanerez ar strollad The Cranberries, a varvas en unan eus kambreier London Hilton on Park Lane.
Enorioù
Enoret eo bet London Hilton on Park Lane gant ar prizioù amañ da heul :
- England's leading business hotel 2009, gant World Travel Awards Europe ;
- Best Hotel in Europe 2010, gant German Business Traveller Magazine ;
- Best Business Hotel in the UK 2011, gant UK Business Traveller Magazine.
