Senato roman
Le Senato roman era le corpore deliberative e legislative del Republica roman e Imperio roman. Con le Populo roman, le Senato formava le stato: senatus populusque romani. Le senatores constitueva un ‘ordine’ roman, con le equites e le plebe. Le senatores era assi le altissime nobilitate roman. Le majoritate de administratores e alte magistratos era senatores. Solmente cives roman mascule ric poteva acceder al Senato, e isto post exercer un magistratura minor. Il habeva 600 senatores post le reformas de Cesare Augusto.
Ben que le imperatores incargava le Senato de multe responsabilitates, relationes inter iste corpore e le princes era sovente tense. Senatores como Helvidio Prisco o Tacito idolisava le republicanos nobile como Caton minor, Bruto e Ciceron; multe imperatores como Tiberio, Caligula o Neron non fideva le Senato e persequeva plure membros de illo qui era suspecte de conjurationes. Senatores era in facto implicate in le assassinatos de Julio Cesare, Caligula e alteres. Totevia, desde le epocha de Cesare Augusto, le major parte del senatores era fidel al principato. Le approbation del Senato era necessari al installation official de un nove prince, e a su divinisation postume.
Formate pot’esser avante le regno roman (753 aEC), le Senato superviveva al regimes republican e imperial (alte e basse). Illo dispareva durante le regno ostrogothic (post 603 EC).
![](https://cdn.statically.io/img/upload.wikimedia.org/wikipedia/commons/thumb/9/98/Roman_SPQR_banner.svg/150px-Roman_SPQR_banner.svg.png)