Sint-Gillis
Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.
Sint-Gillis (Frans: Saint-Gilles) ies 'n gemeinte in 't Brussels Hoofsjtaejelik Gewes. 't Liek ten zuje van 't sjtadscentrum van Brussel en grens dao direk aan. De gemeinte haet 'n oppervlak van 2,52 km² en 44.211 inweunersj (1 januari 2006). 't Ies ein van de diechsbevolkde gemeintes van 't gewes. De börgemeister van Sint-Gillis ies saer 1985 Charles Picqué, dae ouch minister-president van 't gewes ies.
Functies
Sint-Gillis ies 'n woongemeinte, mèt 'n belangriek percentage inweunersj van boetelandse aafkóms (40,46 % in 2004). In Sint-Gillis liek de sjtasie Brussel-Zuud, de belangriekste van de sjtad Brussel. Dao liek ouch 'n groate gevangenis.
Aanziech en bezeenswaerdighede
De gemeinte haet väöl hoezer oet 't begin van de 20e ièw, woa-ónder inkel belangrieke veurbeelde van Art Nouveau. Victor Horta boewde hie zien hoes mèt atelier, dat allewiel e museum ies. De veurmalige gevangenis (1882-1884) ies geboewd in Ingelsje neogotische sjtiel. De Zuudtore (1967), in de buurt van 't Zuudsjtation, ies 'ne beeldbepalende wolkekrabber; 't ies 't hoagste geboew van Belsj. Sint-Gillis haet e monumentaal gemeintehoes oet 1900-1904. De belangriekste sjtraot ies de Waterloose Steenweg, dae löp nao Waterloo. Deze weeg begint bie de Hallepoort, de enigste euvergebleve sjtadspoort oet de ouw ringmoer rónd Brussel (1381).
Historie
Sint-Gillis ies óntsjtange oet 't gehöch Obbrussel (op-Brussel, "hoag Brussel"). In 1795 woort de gemeinte Sint-Gillis opgeriech, ónder Frans regime. De gemeinte kreeg in 1799 'ne eige börgemeister. In de twiède hèlf van de 19e ièw veranderde de plaats van e landboewdörpke in 'n versjtaejelik ónderdeil van de agglomeratie Brussel; 't aantal inweunersj greujde hendig, van 4138 in 1846 tot 63.140 in 1910.
Bies in de jaore 30 van de 20e ièw houw de gemeinte 'n succesvol vootbalcluub, Royale Union Saint-Gilloise, die èlf kièr landskampioen woort (allewiel sjpelend in de twiède klasse).
Gebore in Sint-Gillis
- René Bernier, componis
- Marcel Broodthaers, kunstenaer en diechter
- George Creten, sjilder
- Wilchar, kunstenaer
