Lake Louise i Alberta
Lake Louise er namnet på ein innsjø og ein tettstad i Banff nasjonalpark i den canadiske provinsen Alberta.
Innsjøen sin unike smaragdgrønne farge kjem av finmalne steinpartiklar som vert frakta med smeltevatnet frå isbreane som omgjev sjøen. Området er særs populært for fritidsaktivitetar som vandring, fjellklatring og alpin skiidrett. Innsjøen ligg på 1536 moh.
Lake Louise er oppkalla etter prinsesse Louise Caroline Alberta (1848–1939), dronning Victorias fjerde dotter, som var gift med John Campbell, Canadas generalguvernør frå 1878 til 1883. Provinsen Alberta er òg oppkalla etter prinsesse Louise.
Tettstaden Lake Louise ligg ved Trans-Canada Highway, 180 kilometer vest for Calgary. Frå Lake Louise er det utsikt mot mange snedekte fjelltoppar, som Mount Temple (3543 m), Mount Whyte (2983 m) og Mount Niblock (2976 m).
Austbreidda av innsjøen vert dominert av Chateau Lake Louise, eit luksuriøst feriehotell som vart bygd tidleg på 1900-talet av Canadian Pacific Railway.
Billedgalleri
-
Lake Louise og isbrear om vinteren -
Lake Louise og isbre -
Innsjøen og Chateau Lake Louise
