Lifanunods tidelas volapüka. Charles E. Sprague

Pemotom in zifil Nassau, in Tat New-York, 1842, balsul 9. Famüls paelas bofik oma ebinoms bäledik in Melop, isetevöls de Nelij in yeltum balsevelid.

Estudom in tidastit »Union Colliege«, kel binom in Schenectady in Tat ot. Us ejonom slopi patik al pükastud ed elenadom pükis latinik, glikik, hebik, deutik, flentik e spänik. Teiko efinöl studis ed egetöl diniti: »Artium Baccalaureus« in yel 1862, evedom (äsliko yunans mödik, kopanels oma) solat libavilik in klig gletik bevü Pebaltats e Tats sulevik sulüda. Emilitom jü pug gletik lä Gettysburg, kö egetom glöbavuni da jot nedetik, kel efinom fegonami oma militik, ed emekom lami lifüpo negebik. Finü klig egetom stimadiniti löpikünela »plo duns lanimik e melidik«. Evedom tidel ed eblibom du yels mäl in feb et, tidöl in juls plivadik pükis e plägamis militik. In yel 1870 enütlidom as bukamel (bukikibel) ini spälastit panemöl »Union Dime Savings Institution« in glezif New-York, kel stit labom bonedelis kilsefol mil, e labi: doabs jölbalion. Is eblibom jünu, exänöl ali cal sekretana, dinit kilid in stit. Estudom mödiko bukami ed eblüfom gudumön bukamavi, tölatöl omi as nol gletavik. Binom bisiedal kluba gledinik bukamelas e jäfanas panemöl »Institute of Accounts«. Epükatom komü klub et tefü vp. in yel 1887, jölul 15. Efovom i studön pükis e pükavi in livüps. Binom slopel menodama in lotogaf nelijapüka, e kädan kluba netik »Spelling Reform Association«.

Söl Sprague givom nunodi suköl dö sel okik vpa: »Senit obik pevokom balidna al volapük in yel 1883, zülul, dubü laltüg in gased »Der Hohenloher Bote« (pepüböl in Oehringen, Württemberg). Flen sembal, deutan, ejonom obe laltügi at, pipenöl fa söl Bernhaupt, pakel zilik e kapälik döla volapükik, ed elilädob ko nited gletik dö pük nulik bevünetik. Istudöl pükis gledinik ä bäledik ä nebäledik, enolob, das nonik omas binom fägik dünön as pük bevünetik, noe kodü döfs e fikuls, soi bi netäl sembal regom alimi e givom bizugi ute, kel binom motapük, visü pük foginik, do estudöl omi du yels mödik. Ab nonikan ployegas valik, kelis ixamob, de Wilkins jü Andrews, ijinom labön fomi plagik. Valiks pistaboms su teor, no su plak pükas jeno sibinöl. Edledob, das i Volapük äbinom-la te stud fänik nen völad plagik. Ebonedob foviko bukis volapükik, demü nuläl al nolön: kimik pük nulik binom. Etuvob omi milagiko balnik e nefikulik, sodas ünü dels nemödik ekapälob nomis valik glamata ed ebeginob lilädön e penön. In yel 1884, mälul 18., egetob de datuval dipedi tidela, nüm 77. Sis tim et elilädob ti valikosi, pepüböl tefü vp. ed espodob ko volapükans mödik. Pidob no elabön timi al pakam vobädik dina, ab edunob smalikosi obik medü pükots, spodams, penäds e medü tidabuk oba. In yel 1887 pevälob as kademal fa kongef in München e sis tim at vobob i ziliküno in dins kademik. Volapük olabom füdi gletik in Melop!«

Se Mulapenäd nebolitik: Volapükagased 1888, Nüm: 11, Pads: 63.