User:Nachaira/sandbox
Alvin 'Tio Ali' Inecia
Bida personal
Tio Ali originalmente yamá Alvin E. Inecia nase na Kòrsou dia 4 di mart 1960. Yu di Toni ku Bertha, ruman di Magali ku Errel. For di aña 1994 Alvin Inecia ta aktίvo komo Tio Ali. Alvin Inecia a nase dia 4 di mart di aña 1960. Yu di Toni ku Bertha, ruman di Magali ku Errel. Na kas i den bario tur hende ta yam’é Ali. I for di chikí tur loke tabatin di haber ku arte a yama su atenshon. Semper ora puntra Ali kuantu e gusta aktuashon e ta kontestá: “Si mi por a traha mi kas riba un esenario, ei lo mi a biba”. Den su soño semper el a mira su nòmber skirbí riba bòrchinan grandi ku ta bisa: “E gran artista Alvin Inecia”. Na 1980 Alvin a purba haña un beka pa bai studia Arte, pero komo ta diploma di LTS e tabatin i no di MAVO, e kontesta tabata.: “Bai buska un diploma di MAVO bo bin”. Awendia Ali ta gradisí Dios ku e no a bai pasobra na aña 1982 (dos aña despues) el a konosé Gysela Daal ku kende awendia e tin 29 aña felismente Kasá! Nos ta papia aki di e sostenedó mas grandi di Tio Ali. E otro gran sostenedónan di Tio Ali ta nan dos yunan. Dia Gysela ku Ali a konosé otro tur dos a gusta nòmber di e otro. Alvin a primintí ku su promé yu muhé lo yama Gysela i Gysela tambe a primintí ku su promé yu hòmber lo yama Alvin. I bida a pone tur dos kumpli nan promesa pasobra na aña 1984 nan a kasa ku otro. Promé e pareha a kasa na rat i dia nan a hasi 25 aña kasá na rat nan a kasa na misa. E madrina ku padrinu di kasamentu tabata nan yunan Gysela i Alvin. Mientras tantu Papa Dios a bendishoná nan ku dos nietu (te ainda)ku nan stima sin fin di nada.
Durante henter skol básiko Ali tabata promé pará den rei pa partisipá na tur loke tabatin di haber ku kanta i hasi komedia. E lès ku mas e tabata gusta ta obra di man.
Karera artístiko
Ali su karera artístiko a kuminsá ofisialmente dia 12 di òktober di aña 1974, dia ku Grupo Folkloriko Flamboyan a sali ofisialmente ku un tremendo marcha di seu den bario di Tokaka. Ali a militá un tempu kòrtiku den e Grupo Hubentut di Antigua ku tabata un grupo di kwadria dirigí pa señora Tela. Na aña 1976, ku 16 aña Ali a dirigí Grupo Nos Bandera ku a bira ganadó di un festival di baile folkloriko. Tambe el a baila i dirigí Grupo Nos Amistat di su primu Felix Girigorie. Otro grupo ku Ali a partisipá aden tabata Grupo Orketa Kultural dirigí pa Pachi Sprockel, di Felis Memoria. Orketa Kultural tabata un Grupo di baile, kanto i aktuashon. Klaru ku Ali a partisipá den tur tres disiplina. Pero e disiplina prinsipal di Ali tabata baile. Ali tabata ko protagonista di tur e dos obranan di teater ku e grupo a presentá bou di direkshon di Aina Kwidama, tambe di Felis Memoria. Un di e obranan tabata un komedia pa dia di mama ku Ali mes a skirbi. E promé presentashon rítmiko di Ali tabata pa Pachi Sprockel na su kumpleaños. E presentashon ei tabata un sorpresa pa tantu Pachi Sprockel komo pa miembronan di e grupo. Un sorpresa ku a dal asina duru ku el a bira parti di e repertorio di Orkesta Kultural.
Tambe Ali a lanta un Grupo ku tabata yama Grupo Pegasaya. Tabata un Grupo di Kanto, Baile, Komedia i Poesia ku nan propio músika bibu. Esaki no tabata pa mal kontentu ku grupo di Pachi pero pasobra tabatin mas hende ku kier a partisipá den arte I kultura. Pero e grupo a duna nèt un sho riba un dia di mama i esei tabata tur kos lamentabelmente.
Entre aña 82 pa 84 Ali a dirigí un grupo di baile Folkloriko di mucha ku yama Grupo Kontentu. Pa mustra rèspèt e muchanan mester a yama Ali, Tio Ali. E presentashon mas grandi di Grupo Kontentu tabata den Tele Fiesta di nos Tante Irma, kaminda hinter Kòrsou a miranan.
Na aña ’94, ora Ali a kumisá hasi sho pa mucha el a skohe hustamente e nòmber Tio Ali ku el a haña den e Grupo Kontentu. Otro motibu ta ku Tio ta e famia mas serka di un mucha. Sea e ta ruman di e mama o tata, Tio tin trabou di protekshon i edukashon di su subrina ku kasi ta su yu.
Ali no a sigui desaroyá riba e tereno di baile pasobra mayoria hende den e gruponan di baile tabatin baile komo pasatempu mientras Ali kier a hasi esaki un trabou.
Pesei Ali a disidí ku e ta bai buska algu pa hasi ku no ta dependé di otronan si e ta triunfá o no. I manera el a tuma e desishon ei Dios a manda Yerba Seku, esta Richard Hooi, ku su poesia rítmiko. Esei a resultá di ta nèt e kos ku Ali tabatin mester pa kumisá un kareda artistiko independiente ku a alkansá su gran forma ku Tio Ali. Richard Hooi i su poesia rítmiko a bira sumamente importante den e logro artístiko aki. Tantu asina ku e promé i úniko propaganda ku Tio Ali a hasi den prensa a keda pagá pa Richard Hooi.
Tabata un anunsio ku a keda poné den korant èkstra. Despues ta danki na rekomendashon di Richard Hooi ku Tio Ali a haña su promé dos shonan ku a tuma lugá dia 12 di mei 1994. I despues di esei via propaganda di boka pa boka Tio Ali a bira un gran èksito. Di e manera aki Ali a logra realisá su soño di bira un artista ku ta biba di arte aki na Kòrsou. I te awe Tio Ali ta un trabou i no un bèi djòp. E promé tokadó di tambú ku a kompañá Tio Ali pa hopi aña i te awe ora ta nesesario ta Raymond Justiana, kende Tio Ali a batisá ku e nòmber Òmpi Tio. Dia 12 di mei di aña 2014, ku poder di Dios, Ali Inecia ta kumpli 20 aña trahando komo Tio Ali.
Ali ta konosí pa bisti un kamisa ku yama Dashiki. E ta un paña un tiki hanchu i di hopi koló. Tio Ali ta bisti kasi semper un karson blanku i na su pia un sandalia.
E ta rekonosí i atmirá pa mayornan, dosentenan i muchanan komo e tio di mas kreativo i edukativo den e ramo di entretenimentu pa mucha. Tio Ali ta hasi uso di diferente ekpreshon kultural manera músika di tambu, rima, kuenta, kantika i prinsipalmente poesia rítmiko.
Tio Ali ta perkurá pa den e mesun rosea ku e ta entretené e mucha e ta eduká e mucha. Ora hasi petishon, Tio Ali ta eduká e mucha di un forma rekreativo i dibertido.
Por ehèmpel pa hasi e mucha konsiente di importansia di limpiesa/higiena, Tio Ali ta hasi uso di zonido y moveshon. Pues tokando kantando i bailando Tio Ali ta pasa e mensahe pa e mucha, hóben of mayor.
Tio Ali sa duna tayér y “training”. Tio Ali por duna por ehèmpel un 'training' di kon biba huntu ku otro den harmonia hasiendo uso di su instrumèntnan.
Pa hende grandi (60+),Tio Ali ta presentá komo sosten di aktividat terapia musikal. Tio Ali tambe ta traha ku personanan ku tin un of otro desabilidat. Aparte di esakinan Tio Ali ta skirbi i konta kuenta, skirbi y deklamá poesia tanto suave komo rítmiko i ta skirbi i kanta kantika pa mucha prinsipalmente. Tio Ali a yega di saka CD di kuenta, poesia rítmiko kantika pa mucha.
Buki pa mucha
Tio Ali a públiká e siguiente bukinan.
1987 - E kueru a kumisa ronka:
1989 - Den Skual:
1989 - Pas-Ku Kòrsou:
1990 - Di kurason pa kurason:
1991 - Sertifikado di Amor pa Mama.
2000 - Chòi a mua papa papa – E promé buki pa mucha i te ainda e ùniko di Tio Ali.
Kuenta, Poesia Rίtmiko i Kantika pa mucha
Tio Ali a saka 6 'CD' di kuenta, poesia rítmiko i kantika pa mucha. Nan ta:
1.-Ora Mucha ta mucha, mucha mester keda mucha (Poesia Rítmiko i Kuenta)
2.-Kompa Yuana ta baila (Kuenta I Poesia Rítmiko)
3.-Tio Ali Ta Konta Atrobe (Kuenta, Poesia, Kantika)
4.-Bai Skol Pa Bo Siña No Pa Kòmbèrsá Ku Bisiña.
5.-Tambú pa Orea di Mucha. (Kantika di tambú speshal pa mucha)
6.-Ora Mucha Ta Mucha, Mucha Mester Skucha i Kanta Kantika Pa Mucha!
Tambe Tio Ali a produsí un 'CD' i di kontenido Spiritual pa Famia titulá “Ban Plama E Palabra”.
1992 Den organisashon i kordinashon e trabou mas grandi di Ali tabata kordinashon di selebrashon di 200 aña di lucha pa libertat pa: “Landhuis Kenepa, Biblioteka Públiko i Centraal Historisch Archief”.
Grabashonnan di Ali i Su Amigunan
1990- Disko 45 rpm — Kura di Maria di Wilfrido Pieter + Pensé Bon di Ali Inecia.
1991- LP- lmpakto Turismo Kòrsou (Bou di enkargo di sr. Tico Vos) Den e produkshon aki Yerba Seku tambe a partisipá.
1991 - Kasèt di tambú títulá “Rèspèt” ku 10 komposishon di Ali Inecia.
1992- Kasét di titulá: Prekupá pa Korsou.
1993 - Kasèt di Tambú titulá: Rèfèrèndu a dalnan.
Na aña 1991 te ku 2000 Ali i Su Amigunan a partisipá na Festival di Tumba komo Banda Müsikal.
Di aña 2000 te presente Ali i Su Amigunan ta aktivo komo kor di misa rítmiko.
Rekonosimentu
2000. Tula award. Proponé pa Sr. Jay Havisser i risibí di Stichting Kurá Hulanda
2004. Tapushi di Oro di organisashon Arte di Palabra
2006. Rekonosimentu serka Klup Ambiente di Grandinan
2008. Nombrá komo baluarte di kultura pa Prins Bernhardschool den Siman di kultura.
2008. Partisipashon na Wereld Kinder Festival na Hulanda ku un Grupo di Mucha i Hoben te ku 16 Aña, representando Aruba, Bonaire i Curaçao.
2009. Rekonosimentu na Kolegio San Martin de Porres pa koperashon ku skol.
2009. Nombrá komo Baluarte di Sta. Rosa entre baluartenan di Banda’riba.
2 yüli, dia di bandera homenage komo Baluarte di Banda’riba Dos homenage di Skol Pre Eskolar Mi Pret’i Wowo” den forma di:
Festival di poesia rítmiko dediká na Tio ali
Dedikashon di dak di Mi Pret’i Wowo na Tio ali
2013. 29 yüni, Premio Grótini, Harmonia i kueru
2014. 17 aug. Homenage di Famia Parenchi na Tio Ali
2015. 11 Aprel. Tio Ali a risibi un plaka di merito serka e organisashon "Seu Battle" komo muestra di apresio i gratitut pa loke el a hasi ku hopi amor i dedikashon pa años pa nos kultura di Korsou.
31 Òkt. Bendishonamentu di buki skirbí pa Tio Ali na Van Dorp Aruba. Ta trata aki di un buki dediká na skol I muchananan di Aruba titulá: “Mannan di Futuro di Aruba”. E buki a keda bendishoná pa
Pastor Rey.
Dia 3 Nov. Despues di un tayer duná na un grupo di dosente di Aruba, Tio Ali a presentá e buki na públiko. Esaki tambe a tuma lugá na BNA. (Biblioteka Nashonal Aruba).
2017. 29 Aprel. Promé Charla Spiritual – Tópiko Bida den Spiritu di Harmonia.
Esaki a tuma lugá na Hulanda organisá pa Grupo di Orashon Mama di Rosario.
09 Yüli. Rekonosimentu komo tokadó di WIRI serka Fundashon Museo Ka’i Òrgel relashoná ku desvelo di e monumento: “Patrimono Nashonal di Pueblo”, diseñá pa Giovanni Abath, na rotònde Po’i
Gobiernu dia 9 yüli 2017.
Fuentenan
Alvin Inecia Archives - BNA - Biblioteca Nacional ArubaBNA – Biblioteca Nacional Aruba
https://www.bibliotecanacional.aw/pages/tag/alvin-inecia/
Alvin Inecia, Ali Inecia, Ali I Su Amigunan, Tio Ali.
2014 Dioske ta 40 aña di bida artístiko di Alvin, Ali Inecia.
“Di kuarenta, 20 aña komo Tio Ali”
KUATER ÉPOKA DI HISTORIA KU A KUMISÁ OFISIALMENTE DIA 12 DI ÒKTOBER 1974
Anotashon Y. Aniceta
- Fuentenan no ta bon hinka aden. Nan mester wordu añadí tras di e teksto, kaminda e ta haña un number ku ta korespondé ku ne.