Joʻxori gurtik

Joʻxori gurtik
	; Qoraqalpoq oshxonasining milliy taomi — „Júweri gúrtik“
Turi	xamirli taom
Milliy oshxona	Qoraqalpoq oshxonasi
Asosiy komponentlari	joʻxori uni, piyoz, kartoshka, sabzi, goʻsht

Joʻxori gurtik (qoraqalpoq tilida: Júweri gúrtik, jueri gurtik yoki jugeri gurtik) – qoraqalpoq oshxonasining joʻxori unidan tayyorlanadigan milliy taomi. U Qoraqalpoq oshxonasida keng tayyorlanadigan taom sirasiga kiradi. Taomni odatda beshbarmoq bilan adashtirib yuborishadi.

Tayyorlash jarayoni[edit | edit source]

Joʻxori gurtikni tayyorlashda asosan un va maxsus yormadan foydalaniladi. Un Qoraqolpogʻiston hududida barqaror oʻsimlik boʻlgan joʻxori donidan tayyorlanadi. Taom uchun maydalanib yumoloq shaklga keltirilgan piyoz, kartoshka va sabzi qoʻshilgan goʻsht aralashmasi kerak boʻladi. Bu taom bir qarashda chuchvaraga oʻxshab ketadi^[1]^[2]^[3]. Joʻxori gurtik asosan qoʻzichoq yoki kurka goʻshti aralashmasidan hozir boʻlgan masalliqni joʻxori unidan tayyorlangan tanga shaklidagi xamirga tugish orqali pishiriladi.

„Júweri gúrtik“ kuni[edit | edit source]

2023-yilning 25-fevral kuni turli ijtimoiy tarmoqlar orqali jamoatchilik tarafidan „Júweri gúrtik“ kunini Qoraqalpogʻiston Respublikasida keng nishonlash tashabbusi mahalliy aholi tomonidan qoʻllab-quvvatlangan. Shundan soʻng Xoʻjayli tuman hokimligi, shuningdek, Turizm va madaniy meros vazirligi, Qoraqalpogʻiston Respublikasi Oshpazlar uyushmasi, Nukus shahri 1-sonli ixtisoslashtirilgan madaniyat maktabi jamoasi koʻmagida ilk bor „Júweri gúrtik“ kuni nishonlangan. Joʻxori gurtikning eng katta porsiyasi Nukus shahrida joylashgan prezident maktabida tayyorlangan. Prezident maktabidagi taomni tayyorlash jarayonida 20 ta kurka goʻshti, 35 kg joʻxori uni va 15 kg bugʻdoy uni sarflangan. Tayyorlangan taom diametri 3,5x2,5 metr oʻlchamda tayyorlab olingan „lagan“ga suzilgan^[4]. „Júweri gúrtik“ kunini Rossiya, Qozog‘iston, Qirg‘iziston, Janubiy Koreya va boshqa mamlakatlarda yashovchi qoraqalpoq faollari ham birga nishonlaganlar^[5].