Кинокомедия
Кинокомедия ёки комедияли филм – кино санъати тури. Филмда характер, конфликт, вазиятни тасвирлашда томошабинда кулги қўзғатиш кинокомедиянинг асосий хусусиятидир. Юмористик ва ҳажвий жиҳатлари бир-бирига боғлиқ ҳолда кўрсатилади. Киноводевил, экссентрик „комик“, лирик, маиший, ҳажвий, трагикомик, фантастик кинокомедия жанрлари кенг тарқалган. Сирк, карикатурани ўзида сингдирган экссентрик „комик“ кинокомедия ХХ асрнинг 10—20-йилларида юзага келган (А. Дид, М. Линдер, Р.Клер – Франсия; М. Сеннет, Чарлиэ Чаплин, Б. Китон, Г. Ллойд – АҚШ). Ф.Капра овозсиз кино даврида „Бир кунлик хоним“, „Мистер Дидс шаҳарга кўчиб ўтмоқда“, „Тундаги ҳодиса“ каби филмларни ишлаб Америка кинокомедиясининг ривожланиш даврини бошлаб берди. Кейинчалик А.Блазетти, Х.Бардем, Ж.Беккер, Л.Берланга, Г.Кричтон, Р.Корнелиус каби чет эл режиссёрлари жамиятдаги мавжуд нуқсонларга қарши кинокомедиялар („Миллионер Неапол“, „Трамвай ўғирланди“, „Дадам, ойим, хизматкор қиз ва мен“ ва бошқалар) яратдилар.
Й.Протазановнинг „Насриддин Бухорода“ (1943) филми – биринчи ўзбек кинокомедияси. „Насриддиннинг саргузаштлари“ (режиссёр Н. Ғаниев), „Маҳаллада дув-дув гап“ (Ш. Аббосов), „Келинлар қўзғолони“, „Майсаранинг иши“, „Чимилдиқ“ (М. Абзалов), „Шариф ва Маъриф“, „Темир эркак“ (И. Эргашев), „Бомба“ (З. Мусоқов), „Машарабоз“ (Ш. Бошбеков) ва бошқалар энг яхши ўзбек кинокомедияларидир. Р. Пирмуҳамедов, Р. Ҳамроев, Н. Рахимов, Ҳ. Умаров, С. Хўжаев. Бахтиёр Ихтиёров, Ҳ. Шарипов, О. Асомов, М. Холмедов ва бошқаларнинг ўзбек кинокомедияси ривожида ҳиссалари катта. Замонавий режиссёрлар изланиши натижасида кинокомедия унсурлари кинонинг бошқа жанрларига ҳам сингиб бормоқда.
Адабиётлар
[edit | edit source]- Ўзбекистон миллий энсиклопедияси. Биринчи жилд. Тошкент, 2000-йил.
 |
