Путин Байденга: Янги жазо чоралари киритилиши катта хато бўлади
Сурат манбаси, The White House via Reuters
Россия президенти Владимир Путин Америка президенти Жо Байденни Украина туфайли янги жазо чоралари киритилиши эҳтимоли икки мамлакат ўртасидаги алоқаларни буткул барбод қилиши билан огоҳлантирган.
Пайшанба куни кеч соатларда кечган суҳбат давомида Путин жазо чораларини "ўта йирик хато" бўлишини айтган.
Байден эса агар Россия Украинага бостириб кирса, Америка ва унинг иттифоқчилари қатъий равишда қарор олишларини урғулаган.
Бу телефон суҳбатини сўраб Россия Америкага мурожаат қилган.
Бир ой ичида икки раҳбарлар иккинчи бор суҳбатлашмоқда.
Украина мулозимларига кўра, Россия чегарага 100 мингдан ортиқ қўшин тўплаган.
Айни ҳолат Ғарбнинг хавотирларига сабаб бўлган ва Америка Путинга "мисли кўрилмаган жазо чоралари" билан таҳдид қилганди.
Россия эса Украинага бостириб кириш ҳақидаги даъволарни рад этади.
Қўшинларни эса ўз ҳудудида эркин ҳаракат қилиш ҳуқуқига эга эканини таъкидлайди.
Икки томон сўнгги суҳбат давомида бир - бирларига кескин огоҳлантиришлар беришган бўлса ҳам, Россия ташқи ишлар сиёсати маслаҳатчиси Юрий Ушаковга кўра, Путин бу суҳбатдан "мамнун" бўлган.
Номини ошкор этишни истамаган Американинг юқори лавозимли мулозими айни суҳбатни "жиддий ва салмоқли" деб таърифлаган.
Америка ва Россия мулозимлари келаси ой Женевада учрашишлари кутилмоқда.
BBCUZBEK.COM билан Telegram орқали +44 7858860002 номери билан боғланинг.
Telegram каналимиз: https://t.me/bbcuzbek
