Украина уруши: Буча кўчалари ёнган танк ва жасадларга тўлиб кетган Ukraina Rossiya Putin

Буча шаҳри атрофидаги кўча русларнинг Киевни ўраб олиб, уни ишғол қилиш ва президент Владимир Зеленский ҳукуматини ағдариш умидлари йўлидаги илк қабристонлардан бирига айланди.

Бу 24 февраль куни, рус қўшинлари Украинага кирганидан икки-уч кун ўтиб, Украина қўшинлари Буча шаҳри орқали Киевга ўтаётган рус танклари ��а бронетранспортёрлари карвонини йўқ қилган пайтда содир бўлди.

Карвон рус қўшинлари юришини тўхтатган кўплаб украин пистирмаларидан бирида йўқ қилинди.

Алоқадор мавзулар:

Би-би-си жамоамиз Буча шаҳрига етиб борди. Охирги рус аскарлари жума куни ҳудуддан чиқиб кетганди. Бу Кремль Украина шарқидаги урушга диққат қаратиш қарорининг бир қисми эди.

Москва ҳеч қандай далилсиз Украинанинг марказий қисмидаги ҳарбий мақсадларига эришганини ва ҳеч қачон Киевни эгаллаш режада бўлмаганини даъво қилмоқда.

Ҳақиқат шуки, украинларнинг кутилмаганда қаттиқ ва яхши ташкил этилган қаршилиги русларни пойтахт ташқарисида тўхтатди, буни тасдиқловчи далил шаҳар атрофидаги кўчаларда бўлакланиб вайрон бўлиб ётган рус карвонидир.

Уруш бошланганидан икки-уч ҳафта ўтгач, рус босқинчилари фурсатни бой берди. Нима учун шундай бўлганини Буча кўчаларида кўришингиз мумкин.

Россия ҳаво-десант қўшинларининг элита бўлинмалари бу ерга самолётда ташиш учун етарлича енгил бўлган зирҳли транспорт воситаларида келди. Улар бир неча миль наридаги Гостомел аэропортидан келишганди. Аэропортни босқиннинг биринчи кунида вертолётда келган рус десантчилари қўлга олганди. Ўшанда ҳам Украина қўшинлари жуда қаттиқ қаршилик қилган.

Карвон Буча орқали Киевга кетаётганда, қаттиқ зарбага учради.

Йўл тор ва тўғри, пистирма учун жуда мос эди. Гувоҳларнинг сўзларига кўра, украиналиклар Туркиядан сотиб олинган Байрактар ҳужумчи дронлари билан карвонга ҳужум қилган. Бошқа қўшниларнинг айтишича, ҳудудда Украина ҳудудий мудофаа кўнгиллилари ҳам бўлган.

Хуллас, энг олдида ва сўнгида кетаётган машиналар урилган, ўртадагилар эса қамалиб қолган. Вайрон бўлганларига тегилмаган. 30 миллиметрли артиллерия снарядларининг қолдиқлари атрофдаги ўтлар устида артиллерия қурилмалари билан ёнма-ён ётибди.

Маҳаллий аҳолининг айтишича, ёш муддатли ҳарбий хизматчилар ўзларини Украина ҳудудий мудофаасига топширмасликни илтимос қилиб, қочиб кетишган. Ўзини Гриша амаки деб таништирган 70 ёшлардаги бир киши шундай дейди: "Уларга раҳмим келди. Улар жуда ёш эди, 18-20 ёшларда, уларнинг бутун ҳаёти олдинда эди».

Афтидан, Бучадан чекинишга ҳозирлик кўраётган русларда бундай раҳм-шафқат йўқ эди. Украина қўшинлари шаҳарга кириб келганида камида 20 ўлик эркак кўчада ётган эди. Улардан баъзиларининг қўллари орқасига боғланган. Мэрнинг айтишича, руслар 280 кишини оммавий қабрларга кўмган.

Қолган бир неча тинч аҳоли руслардан қочишга ҳаракат қилишганини айтишди. Улар хрушчевча кўп қаватли уйлари ёнида ўт ёқиб, кўчада овқат пиширишган, чунки уларнинг гази, электр ва суви узилиб қолган.

Кўнгиллилар Украина ғарбидан, ҳеч бўлмаганда географик жиҳатдан урушдан узоқда бўлган Львовдан ва қишлоқлардан юк олиб келишади.

"Бу биз 38 кун ичида еган биринчи нонимиз", дейди Мария исмли аёл оддий кулчалар солинган полиетилен пакетга ишора қилиб. Унинг қизи Лариса менга Совет даврида қурилган турар жойни кўрсатди.

Кўплаб одамлар хавфсиз ҳудудларга ёки чет элга кетган. Руслар уоарнинг ёпиб кетган эшикларини қўпориб бузиб очган.

Бир неча миль узоқликда вайронагарчилик излари Гостомел аэропортигача олиб боради. Россия ҳаво-десант қўшинлари ундан Киевга ҳужум қилиш учун база сифатида фойдаланишга ҳаракат қилганди.

Дунёдаги энг катта транспорт самолёти йўқ қилинди. Унинг учун қурилган улкан ангарнинг томи илма тешик бўлиб кетган. Украинча «Мрия» («Умид») деб аталган самолётнинг ўзи у ерда вайрон бўлиб ётибди.

Бу самолётга украинларнинг йирик лойиҳаларни уддалай олиш қобилияти рамзи, украин фахри сифатида қаралар эди.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek