Путин Ғарбни огоҳлантирди ва Россия халқини камроқ ичишга чақирди
Сурат манбаси, Reuters
Россия Президенти Владимир Путин Ғарб давлатларини Украинага қўшин юборишдан огоҳлантирди.
Бундай қарорнинг оқибатлари "фожиали бўлади", деди у.
Алоқадор мавзулар:
Президент Путин ўзининг йиллик халққа мурожаатида Ғарбни Россияни қурол пойгасига тортишга уринаётганликда айблади.
Шу билан бирга, у Швеция ва Финляндия НАТОга қўшилаётган бир пайтда Россия ўзининг ғарбий чегарасида мудофаасини кучайтириши кераклигини айтди.
Президен�� Путиннинг айтишича, Ғарб Украинадаги можарони "қўзғатган" ва "Россия гўёки Европага ҳужум қилиш ниятида, деб ҳеч уялмасдан ёлғон гапиришда давом этмоқда".
Чамаси Франция президенти Эммануел Макроннинг шу ҳафта бошида НАТО пиёда қўшинларини Украинага юборишни истисно қилиб бўлмайди, деган фикрига ишора қилиб, Президент Путин шундай деди: "Эҳтимолий интервенциячиларнинг оқибатлари... фожиали бўлади".
"Бизда уларнинг ҳудудидаги нишонларга зарба бера оладиган қуролларимиз ҳам бор", — дея қўшимча қилди у.
"Буларнинг барчасининг ҳақиқатан ҳам ядро қуролидан фойдаланишни жалб этувчи можарони келтириб чиқариш ва цивилизацияни йўқ қилиш хавфи бор. Улар буни тушунишмайдими?"
Бир қанча НАТО давлатлари, жумладан АҚШ, Германия ва Буюк Британия Украинага пиёда қўшинлари киритилишини рад этишди.
Президент Путин, шунингдек, Россиянинг замонавий қуроллари - гипертовушли учоқлар ва учувчисиз сув ости кемалари билан мақтанди ва Россиянинг стратегик ядровий кучлари "тўлиқ шай ҳолатда" эканини айтди.
Шуниси эътиборга лойиқки, Президент Путин Россиянинг босқинини "махсус ҳарбий операция" деб таърифлаш кераклигини қайта-қайта таъкидлаганига қарамай, Украинадаги икки йиллик жангларни ўзи "уруш" деб атади.
Сурат манбаси, MIKHAIL SVETLOV
Унинг сўзларига кўра, русларнинг "мутлақ кўпчилиги" унинг Украинага бостириб кириш қарорини қўллаб-қувватлаган ва ҳозирда рус халқи Ғарбнинг мамлакатни заифлаштириш уринишларига қарши бирлашган.
У, шунингдек, АҚШнинг Россия коинотдаги сунъий йўлдошларга қарши ядровий қурол ишлаб чиқараётгани ҳақидаги айбловларини ҳам танқид қилди.
Бу нутқ Россиядаги президентлик сайловларига икки ҳафта қолганида янграмоқда. Сайловдан сўнг Президент Путин бешинчи муддатга президентлик қилиши кутилмоқда.
Кремл матбуот котиби Дмитрий Песков бу мурожаатни "кўп даражада [Путиннинг] сайловолди дастури сифатида кўриш мумкин"лигини айтди.
Дарҳақиқат, мурожаатнинг асосий қисми солиқ тизимини модернизация қилишдан тортиб, Россияда камайиб бораётган туғилиш даражасини оширишга қаратилган пенсия ва имтиёзларгача бўлган ички масалаларга қаратилди.
У, шунингдек, халқ саломатлигини яхшилаш зарурлиги ҳақида гапириб, Россиянинг ўртача умр кўриш давомийлигини оширишга қаратилган қатор чора-тадбирларни эълон қилди. Россиядаги ўртача ҳаёт давомийлиги 70 ёш бўлиб, ҳозирда Европадаги энг паст кўрсаткичлардан биридир.
Одамларни жисмоний фаолликка эътибор қаратишга ва спиртли ичимликлар истеъмолини камайтиришга чақирар экан, у ҳазиллашиб шундай деди: "Ичишни бас қил, чанғи учишни бошла!"
Нутқ рекорд даражада икки соат давом этди ва унда барча юқори мартабали сиёсатчилар, Роснефт ва Газпром нефт ва газ компаниялари раҳбарлари, шунингдек, барча конфессияларнинг диний етакчилари иштирок этди.
У Москва бўйлаб улкан экранларда намойиш этилган ва Россия шаҳарларидаги бир нечта кинотеатрлар уни бепул намойиш қилгани хабар қилинган.
Кутилганидек, икки ҳафта олдин Сибир колониясида вафот этган ва кўпчилик президент Путиннинг энг катта рақиби деб билган мухолифат етакчиси Алексей Навалнийнинг ўлими ҳақида ҳеч нарса айтилмади.
Жума куни Москвада дафн этиладиган Навалний 16 феврал куни ҳали тўлиқ аниқланмаган шароитда вафот этди. Унинг беваси Юлия бунга Президент Путин жавобгар эканлигини таъкидлади.
BBCUZBEK.COM билан Telegram орқали +44 7858860002 номери билан боғланинг.
Telegram каналимиз: https://t.me/bbcuzbek
