Tokonam-pahantrana
Ny tokonam-pahantrana na fetram-pahantrana dia tondro mifandray amin' ny fahantrana. Ny tokonam-pahantrana dia azo faritana tanteraka (mifototra amin' ny sobikam-panjifana faran' izay kely indrindra, misy na tsy misy fanondro ara-bola) na ampitahaina (isanjato mitaha amin' ny salam-pidiram-bola). Ity tokonana ity dia mitaky sanda tena samihafa arakaraka ny safidy momba ny fikajiana ho an' ny firenena iray. Mifanaraka amin' ny isanjaton' ny mponina antsoina hoe taham-pahantrana izany. Ny tokonam-pahantrana ampitahaina dia taha marin-toerana an' ny firenena tsirairay, mahakasika ny 15 % amin' ny mponina; izany akory tsy midika fa ny 15 % amin' ny mponina dia mahantra. Amin' ny lafiny iray, ny taha mifanandrify amin' ny tondro tanteraka dia fanombanana tsara ho an' ny fahantrana. Ny anton-javatra mahakasika ny olona tsirairay dia raisina mba hampifanaraka ny tokonam-pahantrana amin' ny fahasamihafan' ny toe-javatra iainana, ohatra, ny vesatry ny fianakaviana, ny taona, na ny isan' ny olona ao an-tokantrano.
Ny fetram-pahantrana dia ny haben' ny fidiram-bola kely indrindra heverina ho sahaza amin' ny firenena iray. Ny taham-pahantrana dia matetika kajina amin' ny alalan' ny fanombanana ny totalin' ny sandan' ny zavatra ilaina mandritra ny herintaona ho an' ny olondehibe salany. Ny vidim-ponenana, toy ny hofan-trano, dia mazàna no mahaforona ny ampahany lehibe indrindra amin' ity tombanana ity, noho izany ny mpahay toekarena dia manara-maso ny tsenan' ny trano fonenana sy ny tondro hafa momba ny vidim-ponenana amin' ny maha fiantraikany lehibe amin' ny tokonam-pahantrana. Ny anton-javatra momba ny olona tsirairay dia matetika ampiasaina hijerena toe-javatra samihafa, toy ny hoe ray aman-dreny, zokiolona, zanaka, manambady, sns. Ny fetran' ny fahantrana dia azo ahitsy isan-taona. Amin' ny fampiharana, toy ny famaritana ny fahantrana, ny famaritana ôfisialy na iombonana momba ny taham-pahantrana dia ambony lavitra any amin' ny firenena mandroso noho ny any amin' ny firenena andalam-pandrosoana.