Ўзбекистон: Тарихда қолган зулмат – Танзила Норбоева свет ҳақида нима деган эди? O'zbekiston elektr

Сенат раиси Танзила Норбоеванинг мамлакатда электр билан муаммолар тарихда қолгани ҳақида айтган гаплари Интернет ижтимоий тармоқларини, том маънода, "портлатиб" юборган.

Сенат раисининг ушбу таъкиди тармоқ фойдаланувчилари томонидан, асосан, киноя ва норози кайфиятда қабул қилинган.

Айрим фойдаланувчилар Норбоевани нафақат чекка ҳудудлар, балки электр муаммоси кузатилиши одатий ҳолга айлангани айтилган туман марказларидаги аҳволдан ҳам бехабарликда айблаганлар.

Ўзбекистон энергетик бўҳронни бошдан кечирмоқдами?

Шу тариқа, Ўзбекистонда совуқ кунлар мавсуми бошланаётган бир вақтда энергетика муаммоси яна кун тартибига чиққан.

9 сониялик видео

8 ноябрь куни Интернет ижтимоий тармоқларида Ўзбекистон Сенати раисининг электр энергияси таъминоти тўғрисидаги сўзлари акс этган 9 сониялик видео тарқалган.

"Умуман олганда, свет ўчиши, ҳалиги, зулматда ўтириб телевизор кўролмаслик - бу беш йил олдинги тарих эди. Ҳозир бунақанги тарих, Худога шукур, ҳаммаси бартараф қилинди", дейди Норбоева ушбу видеода.

Маҳаллий интернет нашрлари ва фаол тармоқ фойдаланувчилари зудлик билан ушбу видеога эътибор қаратган.

Кейинроқ, Сенат раиси бу гапларни президент сайловини ёритиш бўйича 18 октябрь куни ўтган очиқ мулоқот чоғида айтгани маълум бўлган.

Kun.uz нашри Норбоеванинг ушбу сўзларини изоҳлатиш мақсадида Олий Мажлис Сенати матбуот хизмати билан боғлангани ҳақида ёзган.

Сенат матбуот котиби Мўмин Ибодов 8 ноябрь куни Kun.uz'га жавобан Норбоеванинг гаплари нотўғри талқин қилинаётгани, унинг фикрларига аниқлик киритиш мақсадида айни вақтда тадбирнинг тўлиқ видеоси суриштирилаётганини маълум қилган.

Норбоева ўзи нима деганди?

Сенат раиси гаплари атрофидаги мунозаралар ҳали совимаган бир пайтда Qalampir.uz нашри 18 октябрь кунги тадбирдан видеопарча эълон қилган.

Видеодан Норбоева электр энергияси таъминоти борасидаги фикрларини нашр журналисти Феруза Нажмиддинованинг саволига жавобан билдиргани англашилади.

"Қишлоқ аёллари" куни муносабати билан Тошкент вилояти Пскент туманига бордим. Аёлларнинг сайлов айнан қайси санада бўлаётгани ҳақида маълумотлари бору, лекин номзодлар ҳақида умуман маълумотга эга эмас. Чунки телевизор кўрайлик, деса уларнинг уйида свет йўқ. Кун давомида далада ишлашади", дея чекка ҳудудлар аёлларининг сайловолди жараёнига жалб этилиши тўғрисида савол берган Нажмиддинова.

Нашр эълон қилган видеода Танзила Норбоева ушбу саволга жавоб бериш давомида ҳудудларни электр энергияси, газ билан таъминлаш ишлари босқичма-босқич амалга оширилаётганини таъкидлагани кўринади.

"Балки сизга қайсидир қишлоқдан айтишгандир, лекин буткул свет ўчиб, зулматда ўтирибмиз, деган аҳолининг ўзи йўқ ҳозир. Ҳамма жойда ҳозир свет бор, лекин қандайдир сабаб билан ўчиб қолган бўлса, ўша ердаги мутасаддиларнинг айби билан бўлаётган бўлиши мумкин", деган Норбоева журналист саволига жавоб ўлароқ.

Видеода, шунингдек, Халқ Демократик партияси Зангиота тумани кенгаши раиси Моҳира Акромова журналист Нажмиддинованинг қишлоқ аёллари президентликка номзодларни танимайди қабилидаги фикрига эътироз билдирганини кўриш мумкин.

Акромова нафақат уйда ўтирган, балки далада ишлаётган аёллар ўртасида ҳам сайловолди тарғиботи ишлари фаол олиб борилгани ва журналистнинг "ХДП шижоат билан олиб бораётган ишларни бир оғиз гап билан йўққа чиқариши"га қарши эканини таъкидлаган.

"Свет ҳамма жойда бор. Ҳозир свет йўқ жойнинг ўзи йўқ. Бўлиши мумкин - ҳаттоки, Тошкентнинг ўзида ҳам свет ўчиб туради. Сабаби профилактика деган нарса бор", деган Акромова чиқиши якунида.

Qalampir.uz эълон қилган видеодан туман кенгаши раисининг чиқишидан сўнг Норбоева нозориликларга сабаб бўлган 9 сониялик видеодаги фикрларини билдиргани маълум бўлган.

"Моҳира опа, тушунтириш берганингиз учун раҳмат. Умуман олганда, свет ўчиши, ҳалиги, зулматда ўтириб телевизор кўролмаслик - бу беш йил олдинги тарих эди. Ҳозир бунақанги тарих, Худога шукур, ҳаммаси бартараф қилинди", овозаларга сабаб бўлган сўзларини айтган Норбоева.

Видео тарқалганидан ҳали бир кун ўтар-ўтмас, ижтимоий тармоқ Сенат раисининг таъкидига нисбатан муносабатларга тўлиб тошган.

"Свет ўчиши беш йилги олдинги тарих эди, дейишибди... Ёлғон маълумот тарқатганга қандай жазо бор эди", киноя қилган риштонлик таниқли блогер Дима Қаюм.

"Янги ўзбек мақоли: "Танзила опани гапига ишон, лекин движок ва повер банкини тайёрлаб қўй", ҳазиломуз пост қолдирган журналист Элмурод Эрматов.

"Айни дамда зулматда телевизор кўролмай ўтирганлар фотофактлардан ташланглар. Танзила Норбоевани 5 йил олдинги тарихга қайтарамиз", ҳазил қилган Facebook'даги Раис Бува саҳифаси муаллифи.

Мавзуга алоқадор равишда қўшиқчи Юлдуз Усмонованинг мухлисларига видеомурожаати Telegram каналларида тарқалган.

Видеомурожаатда онасининг таъзиясига борганини айтган Усмонова Марғилонда свет ва газ йўқлигидан шикоят қилаётгани кўринади.

"Ҳозир совқотиб ҳаммамиз, "ўхо-ўхо" бўлиб, касал бўлдик. На свет бор, на газ бор. Совуқ Марғилонда", ёзғиради халқ артисти.

Тарқалган бошқа видеода бир фуқаро нега ўзи яшайдиган ҳудудда электр таъминоти тез-тез ўчирилаётгани сабабини сўраб, "Ўзбекенерго" ходимини сўроққа тутаётгани кўзга ташланади.

Сўроқ-жавоб вақтида ходим электр энергияси таъминотига чеклов ўрнатилганини билдиради.

"Қарангда, ҳозир менга Telegram'дан келди. Сенатнинг раиси чиқиб, "қачон свет бўларкан, деб телевизорни кўролмайдиган вақтлар ўтиб кетди, у беш йил олдинги тарих эди", деб айтяпти. Сиз ҳозир чеклов бор, деяпсиз. Ким қўйиб беряпти?", сўроқлашда давом этади видеодаги фуқаро.

Тармоқдаги мунозараларнинг кўплаб иштирокчилари қиш келмасдан бурун электр энергияси таъминотида узилишлар бошлангани ҳақида ёзганлар.

Бироқ охирги беш йил мобайнида свет ўчиши ҳақиқатан камайганини таъкидлаганлар ҳам учраган.

"Тан олиш керак - свет одингидек ярим кунлаб ўчмаяпти. Бизда кунда 1-2 соат ўчиришяпти холос", изоҳ қолдирган қайси ҳудуддан эканига ойдинлик киритмаган бир Facebook фойдаланувчиси.

Шавкат Мирзиёевнинг илк президентлик даврида аҳолини электр ва табиий газ билан таъминлаш масаласи долзарблигича қолган.

Унинг ўзи ҳам ўтган йиллар давомида мазкур масалага бир неча бор тўхталиб, энергия таъминотидаги узилишларнинг асосий сабаби инфратузилманинг эскириб кетганида эканини тилга олган.

Ижтимоий тармоқларда фаоллаша бошлаган ўзбекистонликлар сўнгги йилларда бу муаммо ҳақида очиқроқ ва кенгроқ ёза бошлаганлар.

Охирги вақт, айниқса, ўтган йили бу норозилик кайфияти реал ҳаётга ҳам кўча бошлаган.

Ўтган қиш мавсумида мамлакатнинг бир неча ҳудудлари аҳолиси свет ва газ таъминотидаги узилишларга норозилик ўлароқ автомобиль йўлларини тўсиб қўйгани кузатилган эди.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek