Янгиликлар: Ўзбекистон ‘Салимбойвачча’ билан яширин тарзда учрашган қирғизистонлик депутатга нисбатан жиноий иш очган – қирғиз матбуоти

Қирғизистонда мамлакат расмийларини "тартибга солиб қўйиш"да ёрдам сўраб, Тошкентда таниқли тадбиркор Салим Абдувалиев билан учрашгани айтилаётган депутат масаласи жиддий баҳсларга сабаб бўлмоқда.

10 январь куни қирғиз парламенти Қирғизистон-Ўзбекистон чегарасини ноқонуний кесиб ўтишда гумонланаётган депутат Эмил Жамгирчиевнинг жиноий жавобгарликка жалб этилишига ру��сат берган.

Жамгирчиев давлат чегарасини ноқонуний кесиб ўтганликда гумонланмоқда.

Жамгирчиев ишини ўрганган Жокоргу Кенеш депутатлар комиссиясининг хулосасига кўра, у 2022 йил декабрида чегарани ноқонуний кесиб ўтган ҳолда Тошкентга борган ва "Салимбойвачча" номи билан танилган ўзбекистонлик тадбиркор билан яширин учрашган.

Шунингдек, чоршанба куни Қирғизистон парламентида ўтган йиғинда давлат чегарасини ноқонуний кесиб ўтиш ҳолати бўйича Ўзбекистон Давлат хавфсизлик хизмати томонидан ҳам жиноий иш қўзғатилгани ҳамда Жамгирчиевга нисбатан қидирув эълон қилингани маълум қилинган.

Қирғиз матбуоти 9 январдан бери депутатнинг қаерда экани номаълум қолаётганини қайд этган.

10 январь кунги йиғинда қатнашган Қирғизистон Миллий хавфсизлик давлат кенгаши раиси Қамчибек Ташиев Жамгирчиев Салим Абдувалиевга "ўз қўли билан деярли ўн варақли" хат ёзгани, хатида қирғиз расмийларига нисбатан чора кўришни сўраганини таъкидлаган.

"Очиғини айтишимиз керак - у [Салим Абдувалиев] Ўзбекистоннинг криминал авторитети. У [Жамгирчиев] криминал авторитетдан кўмак излаган, мамлакатимизни бошқараётган инсонларнинг барини ёмонлаб, уларга чора кўришни сўраган", деган Ташиев 10 январь куни.

Алоқадор мавзулар:

Ойнадан қочган депутат

Қирғиз матбуотининг ёзишича, депутат Эмил Жамгирчиев билан боғлиқ айни можаро бошланиши 2022 йилнинг сўнггига бориб тақалади.

Ўша йилнинг 26 декабрь куни Қирғизистон Миллий хавфсизлик давлат кенгаши Эмил Жамгирчиев ўз уйи ва автомобилида яширин эшитиш мосламалари топилгани тўғрисидаги арзини ўрганиш доирасида кўрсатма бериш учун бир неча бор чақирилгани, аммо депутат алоқага чиқмаётганини маълум қилган.

2023 йилнинг 27 декабрь куни Қирғизистон Бош прокуратураси Жокоргу Кенешга 41 яшар парламент депутати давлат чегарасини ноқонуний кесиб ўтишда гумонланаётгани ҳақида маълумот тақдим этган, мазкур ҳолатни ўрганиш бўйича махсус комиссия ташкил этилган.

9 январь куни ушбу комиссия ўз ишини якунлаган ва унинг ишида шахсан қатнашган депутат Жамгирчиев матбуот анжумани ўтказишини билдирган, бироқ тўсатдан ғойиб бўлган.

Кейинроқ ижтимоий тармоқда депутатнинг парламент биноси иккинчи қаватидан пастга сакраб, қочиб кетаётган тасвирланган видеолар пайдо бўлган.

"Салимбойвачча" билан учрашув

10 январь куни Қирғизистон парламентида депутатлар комиссияси аниқлаган хулосалар тингланган.

Комиссия раҳбари Алишер Эрбаев Жамгирчиев ўзи маълум вақт ғойиб бўлган 2022 йилнинг декабрида Салим Абдувалиев билан кўришиш учун Ўзбекистонга ноқонуний тарзда ўтгани аниқланганини билдирган.

"2022 йилнинг декабрь ойида Эмил Жамгирчиев Қирғизистон чегарасини ноқонуний кесиб ўтиб, Марказий Осиёда машҳур Салим Абдувалиевдан ёрдам сўраш учун Тошкентга борган. Мазкур учрашувдан сўнг Жамгирчиев 2022 йилнинг декабрида Ўзбекистон ва Қирғизистон чегарасини ноқонуний кесиб ўтиб, Бишкекка қайтган", сўзлаган Эрбаев йиғиндаги ўз чиқишида.

Мазкур йиғинда иштирок этган Қирғизистон Миллий хавфсизлик давлат кенгаши раиси Қамчибек Ташиев парламент депутати ўзбекистонлик тадбиркордан айнан қандай ёрдам сўраганига аниқлик киритган.

"Жамгирчиев Салим Абдувалиевга ўз қўли билан ўн вараққа яқин хат ёзган. Сизларга қизиқ жойларини ўқиб бераман. Хатида у Қамчибек Қидиршаевич ортимдан туҳмат қилиб, $180 минг ундирди, деб ёзган. Бу бўйича биз иш очганмиз. Аниқлашимизча, сайлов��ар пайтида ёнимизда юрган икки йигит Жамгирчиевнинг отасининг ёнига бориб, Қамчибек Қидиршаевичга пул керак бўлиб қолди, деб менинг номимдан пул ундирган. Биз у йигитларни топиб, қамаб, $180 мингни Жамгирчиевнинг отасига қайтариб бердик", сўзлаган Ташиев.

Қирғизистон хавфсизлик хизмати раҳбари Жамгирчиев, шунингдек, ўз хатида Салим Абдувалиевни "Марказий Осиёда тартибни сақлаб турувчи шахс" сифатида тасвирлаб, Қирғизистоннинг барча президентлари сайловдан аввал, гўё, ўзбекистонлик тадбиркордан ижозат сўраганини тилга олгани, шуни ҳисобга олган ҳолда, "ҳаддидан ошган қирғизистонлик амалдорлар"ни тартибга солиб қўйишни илтимос қилгани ҳақида гапирган.

"Бу нима дегани? Бутун мамлакатни масхарахонага айлантириб юборган. Қачон бизнинг президентларимиз криминал авторитетдан ижозат сўраган? Ҳеч қачон бундай бўлмаган ва бўлмайди ҳам", таъкидлаган Ташиев парламент йиғинида.

Қамчибек Ташиев Салим Абдувалиевнинг ўзи Эмил Жамгирчиев билан учрашганини тан олганини тилга олган.

"Бош прокуратура иш қўзғатгандан кейин бизнинг терговчиларимиз Тошкентга бориб, ўзбекистонлик ҳамкасблари билан бирга Салимбойваччани сўроқ қилишди. У учрашганини тан олди, Жамгирчиев Қирғизистон тартибсиз бўлиб кетди, тартибга солишда ёрдам беринг, деб сўраганини айтди. Лекин мен Қирғизистонга аралашмайман, деб жавоб бергани ҳақида гапирди".

Ташиев, шунингдек, Ўзбекистон томони Эмил Жамгирчиевга нисбатан фирибгарлик ва давлат чегарасини ноқонуний кесиб ўтиш ҳолатлари бўйича иккита жиноят иши қўзғатганини қўшимча қилган.

Ўзбекистон томони, ҳозирча, бу маълумот юзасидан расмий изоҳ эълон қилмаган.

Эслатма ўрнида, "Салимбойвачча" номи билан танилган тадбиркор Салим Абдувалиев Ўзбекистонда декабрь ойида бошланган "кўчага қарши рейдлар" доирасида қўлга олинган.

У ноқонуний қурол сақлашда гумонланмоқда.

Қамчибек Ташиев қирғизистонлик депутатнинг чегарани яширин тарзда кесиб ўтган ҳолда Салим Абдувалиев билан учрашгани бир йилга чўзилган текширув ортидан тўсатдан аниқланганини айтган.

Унинг билдиришича, Қирғизистон разведка хизматига Жокоргу Кенешда ишловчи консультантлар��ан бири хорижга ҳужжатларни жўнаётгани ҳақида маълумот келиб тушган.

"Биз қайси консультант қандай ҳужжатларни қаерга жўнатяпти, деб ўрганиб, Жамгирчиевга чиқиб қолдик".

Ташиевнинг сўзларига кўра, бунга қадар Жамгирчиевнинг яширин тарзда Ўзбекистонга ўтгани маълум бўлмаган.

"Бошида биз бу қандай ҳужжатлар эканини билмадик, билганимиз улар Жокоргу Кенешдан олиб чиқилгани эди. Жокоргу Кенешнинг еттита расмий бланки Тошкентга жўнатилган. Биз ҳам бориб қарасак, ҳужжатларни шахсан Жамгирчиев кутиб оляпти. Текширсак, депутат расман чегарадан ўтмаган, лекин Тошкентда юрибди. Ана шундан кейин суриштирувни бошладик. Ҳаммасини аниқлаштирганимизгача бир йил кетди".

Бироқ Ташиев қирғиз парламенти депутати Ўзбекистонга айнан қандай ҳужжатларни нима мақсадда олиб ўтганига аниқлик киритмаган.

Қирғиз хавфсизлик хизмати раҳбари 9 январдан буён қаердалиги номаълум қолаётган Жамгирчиевни терговга ўз ихтиёри билан келишга чақирган, у ҳибсга олинмаслигини тилга олган.

"У ҳеч кимга зарар етказмади, шу сабабдан уни ҳибсга олишни ўйламадик. Ҳозир қаердадир яшириниб ётибди. Терговчилар олдига келсин, ҳибсга олмаймиз. Ишни судга оширамиз, суд қарор чиқаради. Шуни Жамгирчиевга етказиб қўйинглар", деган Ташиев.

Айни вақтда, Би-би-си Эмил Жамгирчиев иши бўйича Ўзбекистон томони муносабатини ўрганишга ҳаракат қилмоқда.

Telegram каналимиз: https://t.me/bbcuzbek

BBCUZBEK.COM билан Telegram орқали +44 7858860002 номери билан боғланинг.