Путин огоҳлантирди: Россия Ғарбга қарши ҳужумлар учун қурол беради

Россия Президенти Владимир Путин Ғарб нишонларига ҳужумга қаратилган мамлакатларни Москва қуроллантириши мумкинлигидан огоҳлантирди.

Президент Путин ушбу баёнотни Украинага узоқ масофага мўлжалланган қурол-яроғ бераётган Ғарбни танқид қилиши асносида берди.

Бир неча мамлакатлар, хусусан, Қўшма Штатлар Украинага Россия ичкарисидаги нишонларг�� ҳужум қилишга "яшил чироқ" бердилар.

Алоқадор мавзулар:ғ

"Бундай ҳаракатлар жуда жиддий муаммоларга етаклайди" деди Путин хорижий журналистлар билан учрашувда.

"Агар кимдир бизнинг ҳудудларимизга ҳужум қиладиган уруш зонасига бундай қуролларни етказиб бериш ва биз учун муаммо пайдо қилиш мумкин деб ўйлаётган бўлса, нега бизнинг ўша мамлакатларнинг нозик иншоотларига ҳужум қилиши мумкин бўлган дунёнинг ҳудудларига худди шундай қурол билан таъминлашга ҳаққимиз бўлмаслиги керак?", деди Россия президенти.

"Бунга жавоб муносиб бўлиши мумкин. Биз бу ҳақда ўйлаб кўрамиз", деди Президент Путин.

Россия президенти Москва қайси мамлакатларга қурол етказиб бериши мумкинлигини аниқ айтмади.

Президент Путин яқинда Германияда ишлаб чиқарилган узоқ масаофага мўлжалланган қуроллар билан Россия ичкари ҳудудидаги нишонларга зарба беришда Украинанинг ихтиёри ўзида деган Германияни тилга олди.

"Россия ҳудудидаги нишонларга зарба берадиган янада кўпроқ ракеталар етказиб берилади, дейишаяпти улар. Бу Россия-Германия алоқаларини аниқ бузади", деди жаноб Путин.

АҚШ Президенти Жо Байден Украинага АҚШ етказиб берган қуроллар билан Россиядаги нишонларга ҳужум қилишга рухсат берди, фақат Харкив вилоятига яқин Россия ҳудудларига.

Оқ Уй, Украина узоқ масофага мўлжалланган ATACMS ракеталарини Россия заминига қўллай олмайди, деди.

Украина яқинда АҚШ қуроллари билан Россия ичкарисига ҳужум қилди, дея хабар берди бир АҚШ сенатори ва ғарбий расмийлардан бири Associated Press ахборот агентлигига.

Россиянинг Украина шимолий чегараларига қарши янги ҳужумларни бошлаганидан буён шимоли-шарқий Харкив вилоятида қақшатқич жанглар бораяпти.

Харкив Россия чегарасидан 30 кмча узоқликда жойлашган.

Буюк Британия Ташқи ишлар вазири Лорд Кэмерон, "Британия қуролларини қандай ишлатиш Украинанинг ўзининг ихтиёрида- ва Украинанинг Россия ичкарисидаги нишонларга ҳужум қилиш ҳаққи бор", деди.

Украина расмийлари хабар қилишича, Россия Украина ҳудудига Шимолий Кореянинг ракеталари билан ҳужум қилаяпти.

Ғарб жосуслик идоралари хабар қилишича, Украина урушида Россия Эронда ишлаб чиқарилган "Шаҳед" дронларидан фойдаланаяпти.

Россия Украинага тўлақонли босқинни 2022 йил февралида бошлади.

Россия Президенти Владимир Путин хорижий журналистлар билан йиллик Санкт-Петербург Халқаро Иқтисодий форуми доирасида учрашган, Путин билан мулоқотда Ўзбекистон Миллий Ахборот агентлиги ЎзА Бош директори Абдусаид Кўчимов ҳам қатнашган ва Россиянинг Толибон билан алоқалари ҳақида Россия президентининг фикрини сўради.

Президент Путин, "Москва ўзининг ядровий қуролини ишлатмайди" деб Ғарб хато ўйлаяпти", деб ҳам огоҳлантирди.

"Қандайдир сабаблар билан Ғарб Россия уни ҳеч қачон қўлламайди деб ишонади", дея жавоб берди жаноб Путин Рейтерс ахборот агентлигининг Украина сабаб ядровий кескинлашиш таҳдиди борми деган саволига.

"Бизнинг ядровий доктринамиз бор, қаранг у ерда нима ёзилганини. Агар кимнингдир амаллари бизнинг суверенитетимиз, ҳудудий яхлитлигимизга таҳдид солса, биз ўзимизнинг ихтиёримиздаги ҳамма воситаларни ишга соламиз", деди Президент Путин.

"Буни енгилтаклик билан, юзаки қабул қилмаслик керак" деди Россия президенти.

Шунингдек, Президент Путин Россия НАТО ҳудудига ҳужум қилишни режалаётгани ҳақидаги фикрни рад этди.

"Сиз Россияни ўзингизга душман қилмаслигингиз керак. Бу билан фақат ўзингизга шикаст етказасиз, шуни биласизми?", деди Президент Путин.

"Улар Россия НАТОга ҳужум қилишни хоҳлайди деб ўйлашади? Сиз тўла ақлдан оздингизми? Мана бу столдек тўнками? Буни ким ўйлаб топди? Бу буткул бемаънилик", деди Россия президенти.

Telegram kanalimiz: https://t.me/bbcuzbek

BBC.COM/UZBEK

Telegramda bog'lanish raqami +44 7858860002