Франция: Шок сайловда Ислом ва миграцияга қарши партиялар ютқазди. Аммо, ғолиб борми?

ANDRE PAIN/EPA-EFE/REX/SHUTTERSTOCK

Сурат манбаси, ANDRE PAIN/EPA-EFE/REX/SHUTTERSTOCK

Сурат тагсўзи, Ўз танқидчилари томонидан экстремист деб кўриладиган сўл-қанот ветерани Жан-Лук Меленшон ғалабани эълон қилди.

Франция парламент сайловларининг якшанба куни ўтган иккинчи босқичида ўта ўнг қанот партиялар кутилмаганда мағлуб бўлишди.

Якшанба оқшомига бориб барча телеканалларда натижалар графикаси намойиш қилинар экан, Марин Ле Пен ва унинг бош вазирликка номзод ёш шогирди Жордан Барделла катта овоз йиға олмаганлари аниқ бўлди.

Биринчи босқичдаги йирик муваффақияти ортидан парламентда устунлик қилиши кутилган Ле Пеннинг "Миллий Марш" партияси овозлар сонида атиги учинчи ўринни олди.

Кутилмаганда социалистлар, коммунистлар ва яшиллардан ташкил топган сўл қанот партиялари энг кўп овозни олдилар. Президент Эммануэл Макроннинг марказчи "Ренессанс" партияси эса овозлар сони бўйича иккинчи ўринни эгаллади.

BBC

Ўз танқидчилари томонидан экстремист деб кўриладиган сўл-қанот ветерани Жан-Лук Меленшон ғалабани эълон қилди.

Алоқадор мавзулар:

Нега Британия сайловларида Лейбористлар ғалаба қилди?

Ўзбекистондан келган ишчилар Британияда жинсий зўравонлик айбларига тортилмоқда (Подкаст)

Ўзбекистон, мигрантлар: Европага қандай кетса бўлади? Янгиликлар (видео)

Парижнинг Сталинград ҳиёбонида ўз тарафдорларига юзланиб у шундай деди: "Президент "Янги халқ фронти" коалициясини ҳукуматни тузишга чақириши керак".

Биринчи босқичдаги аянчли натижалари ортидан Меленшон тезда янгича тактик иттифоқ тузишга мажбур бўлганди. Бу иттифоққа унинг радикал "Тиз чўкмаган Франция" партияси, яшиллар, социалистлар, коммунистлар ва ҳатто троцкийчилар қўшилдилар.

Марин Ле Пен ва унинг бош вазирликка номзод ёш шогирди Жордан Барделла катта овоз йиға олмаганлари аниқ бўлди.

Сурат манбаси, MOHAMMED BADRA/EPA-EFE/REX/SHUTTERSTOCK

Сурат тагсўзи, Марин Ле Пен ва унинг бош вазирликка номзод ёш шогирди Жордан Барделла катта овоз йиға олмаганлари аниқ бўлди.

Лекин, биронта ҳам партия ё иттифоқда 577 ўринли парламентда камида 289 ўрин билан устунлик қилишга етарли овоз йўқ. Демак, Францияда энди парламент муаллақ.

Марин Ле Пен мағлубиятни тан олса-да, муваффақиятига эътибор қаратди. "Икки йил аввал бизда атиги еттита депутат бор эди. Бугун эса Миллий Марш депутатлар сони бўйича Франциядаги биринчи партия", - деди у.

Якшанба куни сайлов участкаларига Франция сайловчиларининг 66,63 фоизи келди. Бу 1997 йилдан бери парламент сайловларининг иккинчи босқичидаги энг катта кўрсаткич.

Биринчи босқичда Францияга келаётган мигрантлар оқими ва Ислом динига қарши сиёсий дастурини тарғиб қилган Миллий Марш энг кўп овозни олганида, бошқа партиялар ларзага келдилар.

Франция ўз тарихида илк марта миллатчилар қўлига ўтиши имкони пайдо бўлди.

TELMO PINTO/SOPA IMAGES

Сурат манбаси, TELMO PINTO/SOPA IMAGES

Сурат тагсўзи, Яшилларнинг лидери Марин Тонделиер ўз тарафдорларини миллатчиларга қарши бирлашишга чақирди.

Аммо, социалистлар, коммунистлар ва яшиллар ўзаро фарқларини четга суриб, сайловчиларни тактик овоз беришга чақирдилар - яъни, миллатчилар иккинчи босқичда ғолиб бўлмасликлари учун бир-бирини қўллаб-қувватладилар.

Миллатчиларнинг очиқчасига ирқчи номзодлари Франция матбуотида кўп муҳокама қилинди ва сўл қанот фаоллари ҳатто кўчаларда ҳужумга учради.

Франциядаги Би-би-си мухбири Пол Кирбига кўра, мамлакат энди сиёсий беқарорлик босқичига чиқди. Аҳоли қутблашган, Париж, Лион ва Нант кўчаларида одамлар ҳужумга учраган. Сиёсий фарқлар ўта катта.

Бу тафовутларни қисқартириш масъулияти энди Президент Макроннинг гарданида.

Янги парламент 10 кундан кейин иш бошлаши керак, 26 июлда эса Париж Олимпия ўйинларига мезбонлик қилади. Францияга ҳозир тинчлик керак.

Telegram kanalimiz: https://t.me/bbcuzbek

BBC.COM/UZBEK

Telegramda bog'lanish raqami +44 7858860002