Jinsiy zoʻrlangan 10 yashar qiz farzand koʻrdi
Сурат манбаси, AFP
Hindiston Oliy mahkamasi abort qilishini taqiqlagan 10 yashar qiz Kesarevo jarrohlik amaliyoti bilan qiz farzand koʻrgan.
Matbuot xabarlariga koʻra, qiz tugʻayotganini anglab yetmagan ham.
Kattalar unga "oshqozoningda katta tosh bor, shuning uchun qorning katta boʻlib ketayapti", deb aytishgan.
Kesarevo amaliyotining mahalliy vaqt bilan soat 9:22da Chandigarhdagi shifoxonada boʻlib oʻtgani xabar qilingan.
Doyalarning BBCga maʼlum qilishlaricha, qiz chaqaloqning ogʻirligi 2,5 kilogrammni tashkil etgan.
Onaning ham, chaqaloqning ham salomatligi yaxshi, deyishgan shifokorlar.
Xabar qilinishicha, qizaloqni oxirgi yetti oy mobaynida togʻasi bir necha marta jinsiy zoʻrlagan.
Iyul oyi oʻrtalarida qiz qornidagi ogʻriqdan shikoyat qilgan va ota-onasi uni shifokorga olib borishgan.
Tibbiy tekshiruv payti uning jinsiy zoʻrlangani va homilador ekani ayon boʻlgan.
Togʻasi hibsga olingan.
Chandigarhdagi mahkama ota-onaning homilani abort qilish talabini qondirishdan bosh tortgan va bu 10 yoshli qiz homilador boʻlishi mumkin emas, degan qaror chiqargan.
Сурат манбаси, AFP
Shifokorlar hayʼati esa bu yoshda abort qizning hayoti uchun "haddan ziyod xatarli" degan xulosa berganlar.
Keyinroq Hindiston Oliy mahkamasi ham abort soʻrovini rad etgan.
Chaqaloqning 35 haftalik boʻlib tugʻilgani aytilmoqda.
Shu bois chaqaloq tugʻruqxonada bir necha kun saqlanishi lozim, demoqdalar shifokorlar.
Yosh onani ham 10 kun davomida shifoxonada parvarishlashga qaror qilingan.
10 yashar qizaloqning ota-onasi homiladan allaqachon voz kechganlar.
BBC muxbirlari xabar qilishlaricha, rasmiylar chaqaloqning yetimxonaga berilishi, soʻng biror oilaga boqib olishga berilishi mumkinligini aytishgan.
Bu qadar yosh qizning tugʻishi Hindiston tarixida birinchi marta kuzatilgan.
Shu bois bu hodisa nafaqat Hindiston, balki jahon matbuotining ham eʼtiboriga tushdi.
Hindiston qonunlari boʻyicha homilani 20-haftasidan keyin abort qilish mumkin emas, faqat onaning hayoti uchun tahdid bor, deb koʻrilgan holatlardagina abortga ruxsat beriladi.
Biroq soʻnggi yillarda jinsiy zoʻravonlik qurbonlari boʻlgan qizlar tarafdorlari petitsiyalar uyushtirdilar, 20 haftadan oshgan boʻlsa ham homilani oldirishni talab qildirdilar.
Aksar hollarda bolalarning oʻzlari ham homiladorligini anglab yetmaganlari aniq boʻldi.
Hindistondagi jinsiy zoʻravonlik miqyosi
- Mamlakatda har 155 daqiqada yoshi 16 dan kichik bir qiz yoki bola jinsiy zoʻrlanadi, har 13 soatda esa yoshi 10 dan kichik qiz yoki oʻgʻil
- 2015 yili 10000 bola zoʻrlangan
- Hindistonda yoshi 18 ga toʻlmay turib 240 million qiz turmushga uzatilgan
- Hukumat oʻtkazgan soʻrovda qatnashgan bolalarning 53.22% foizi jinsiy tegajogʻlikka duch kelganini aytgan
- Jinsiy zoʻravonlikka qoʻr urganlarning 50% i bolaga yaqin inson boʻlgan
Manbalar: Hindiston hukumati, UNICEF
BBC Oʻzbek xizmati bilan Whatsapp, Telegram va Viber orqali bogʻlanishni istasangiz, telefonimiz: +44 78-58-86-00-02
