Шошилинч: WikiLeaks асосчиси Жулиан Ассанж қамоқдан чиқарилди – у тез орада озод бўлиши кутилмоқда

WikiLeaks асосчиси, ҳарбий сирларни очиқлашда айбланиши ортидан умрининг катта қисмини ёпиқликда ўтказиб келаётган журналист Жулиан Ассанж Лондондаги турмадан озод этилди.

Ассанж 24 июнь куни тонгда Лондондаги қаттиқ тартибли "Белмарш" қамоқхонасидан чиқарилган.

Лондон Олий суди уни гаров эвазига озод этган, журналист шу куннинг ўзида Британияни тарк этган.

Сешанбага ўтар кечаси эълон қилинган суд ҳужжатлари мазмунига кўра, Ассанж АҚШ адлия органлари билан келишувга эришган ва келишув доирасида ўзини ҳарбий сирларни очиқлашда айбдор дея тан олишга рози бўлган.

Дастлабки маълумотларга кўра, Ассанж ўтирган самолёт АҚШга қарашли Шимолий Мариан оролларига бориб қўнади ва 26 июнь куни у ерда журналист устидан суд бўлиб ўтади.

АҚШ Адлия вазирлиги билан келишувга биноан судда 52 яшар Жулиан Ассанжга нисбатан миллий мудофаага оид махфий маълумотларни қўлга киритиш ва уларни очиқлашга қасд қилиш бўйича айблов илгари сурилиши кутилмоқда.

Шунингдек, суд уни 62 ойлик қамоқ жазосига ҳукм қилади, аммо Ассанж розилик билдирган келишув остида унинг Британия қамоғида ўтказган вақти инобатга олиниб, у шу заҳоти озодликка чиқади.

АҚШ Адлия вазирлиги суддан сў��г Жулиан Ассанж ўз ватани - Австралияга қайтишидан умид қилаётганини маълум қилган.

Кейинроқ журналист суддан сўнг "имкон қадар тезроқ" Австралияга қайтишини унинг яқинлари ҳам тасдиқлаган.

Бироқ АҚШ адлия органлари ва Жулиан Ассанж ўртасидаги келишув ҳали якунига етмагани, шу сабабдан журналистни ҳозирча тўлиқ озод инсон, деб атаб бўлмаслиги айтилмоқда.

Аввалига, WikiLeaks асосчисига АҚШнинг асосан Жосуслик тўғрисидаги қонунига таянилган 18 банддан иборат айблов илгари сурилган эди.

АҚШ Ассанжни Афғонистон ва Ироқдаги урушларга алоқадор махфий ҳарбий ҳужжатлар, дипломатик ёзишмаларни очиқлашда айблаган.

Эндиликда, маълум бўлишича, Ассанж ўзининг фақат бир банд бўйича айбдор деб тан олишга рози бўлган.

Ўз манбаси маълумотига таяниб, CНН телеканалининг хабар қилишича, АҚШ Федерал қидирув бюроси ва Адлия вазирлиги Ассанжнинг ўзига нисбатан очилган жиноят иши доирасида айбини тан олиши кўзда тутилмаган ҳар қандай келишувга қарши туриб келган.

Озодликка чиқаётгани ҳақида хабар берилаётган WikiLeaks асосчиси охирги 12 йилни ёпиқликда ўтказишда мажбур бўлган.

Жулиан Ассанж 2006 йилда асос солган WikiLeaks портали кино саноатидан тортиб урушларга қадар алоқадор минглаб махфий ҳужжатларни эълон қилгани билан машҳур.

2010 йилда порталда Ироқдаги тинч аҳолини ўлдираётган АҚШ ҳарбий вертолёти тасвирлари пайдо бўлган.

Портал чоп этган Афғонистондаги урушга доир ҳужжатларда эса АҚШ ҳарбийлари қандай қилиб юзлаб тинч аҳолини ўлдиргани ҳақида сўз боради.

Ироқдаги урушга оид WikiLeaks кейинроқ эълон қилган ҳужжатлардан 60 мингдан зиёд тинч одамлар ўлдирилгани, шунингдек, Ироқ қамоқхоналарида маҳбуслар қийноққа тутилгани аён бўлган.

Америка WikiLeaks очиқлаган ҳужжатларни мамлакат тарихидаги энг йирик махфий маълумот сиздирилишларидан бири, дея атаган.

Шунингдек, АҚШ ҳукумати WikiLeaks эълон қилган махфий маълумотлар одамларнинг ҳаётини хавф остига қўйганини таъкидлаб келади.

2010 йилда Швеция Бош прокуратураси ўша вақтда Лондонда бўлган Жулиан Ассанжни жинсий зўравонликда айблаган, 2012 йилда Британия Олий суди эса Ассанжни Швецияга экстрадиция қилиш тўғрисида ҳукм чиқарган.

Ассанж ушбу айбловни қатъиян рад этган ва швед ҳукумати уни АҚШ қўлига топшириш учун баҳона излаётганини таъкидлаган. Кейинроқ жинсий зўравонлик айби ундан олиб ташланган.

2012 йил июнь ойида юридик таъқиблардан қочиб Эквадорнинг Лондондаги элчихонасига кирган Ассанж у ерда етти йил умрини ўтказган.

Эквадор ҳукумати унга бошпана ва фуқаролик тақдим этган.

Америка Бош прокуратураси Ассанжни ҳибсга олиш АҚШ учун "устувор масала" эканини билдирган.

2019 йилда Ассанж сиёсий бошпана шартларини бузганликда айбланиб, Эквадор элчихонасидан чиқариб юборилган.

Британия ҳукумати журналистни ҳибсга олиб, "Белмарш" қамоқхонасига жойлаштирган ва шундан бери уни АҚШга экстрадиция қилиш масаласи кўриб келинаётган эди.

Telegram каналимиз: https://t.me/bbcuzbek

BBCUZBEK.COM билан Telegram орқали +44 7858860002 номери билан боғланинг.