Britaniyada o‘qish, Oksford talabasi: Xorazmiyning fanga hissasini hech kim hatlab o‘tolmaydi O'zbekiston Ta'lim Dunyo Yangiliklar

O'zbekiston hukumati oliy ta'limni dunyoning ilg'or universitetlari tartiblariga moslayapti, tobora ko'p sondagi O'zbek yoshlari jahonning eng oldi oliy o'quv muassasalari imtihonlaridan muvaffaqiyatli o'tib, nufuzli universitetlarda ta'lim olish imkoniyatini qo'lga kiritayaptilar.

Britaniya universitetlarida o'qish imkoniyatlarini izlayotganlar ham bor, shuning uchun ham biz Britaniya universitetlari va talabalari haqida maqolalar tayyorlashga qaror qildik.

Qariyb ming yillik dorilfunun

Oksford universiteti dunyoning eng qadimiy va ayni paytda eng dongdor universitetlaridan biri.

Asos solingan aniq yili noma'lum, ammo hali 1096 yili Oksfordda saboq berilgani ma'lumotlari saqlanib qolgan.

Bugungi kunda universitetda 22000 talaba tahsil oladi va turli fanlar bo'yicha bakalavriat va magistrlik kurslari o'qitiladi.

Bular matematika, meditsina, kimyo, musiqa va huquqshunoslik kabi 50 dan ortiq yo'nalishlar.

Oksford universitetida Buyuk Britaniyaning 28 bosh vaziri, jumladan, joriy Bosh vazir Rishi Sunak tahsil olgan.

Oksford universitetini 27 Nobel mukofoti laureati, 50 Nobel sovrindori, taniqli olim Stiven Xoking bitirgan.

Universitetda kollej tizimi joriy etilgan, u erda o'qish pullik.

Oksford universitetiga ariza topshirgan talaba sabog'i paytida yashaydigan "kollejni tanlashi" lozim.

Oksford shahri bo'ylab yoyilgan 39 kollej mavjud.

Dunyoning eng nufuzli universitetlaridan biri hisoblanadigan Oksford The World University Ranking reytingida ko'p yillar birinchi o'rinni egallagan.

Oksford universiteti talabasi Luka Morgan bilan suhbat

Savol: Siz qayerliksiz?

Luka Morgan: Mening onam italyan, otam irland. Men Angliyada tug'ilganman. London janubi-sharqida o'sib ulg'ayganman.

Savol: Universitetda nima o'rganayapsiz va nega?

Luka Morgan: Men universitetda kimyo bo'yicha magistrlik darajasi bo'yicha o'qiyapman, hozir birinchi kursdaman. Ilm-fan doim meni maftun etgan, har doim uni tushunishga harakat qilganman. Lekin meni hammasidan ham ko'proq o'ziga tortgani - odamzod qanday qilib turli jism va buyumlardan mo''jizaviy narsalar yasashning uddasidan chiqqani va olamni o'ziga moslashtira olgani. Kim o'ylovdi o'simliklar hosilining bir necha avlodiga quvvat beroladigan o'g'it havodan olinadi deb? Mana shunday mo''jizalar meni kimyo faniga qiziqishimni paydo qilgan, kelajak hayotim uchun kimyoni tanlashimga turtki bergan. Men bir kun kelib tarixiy ixtiroqlar qilishga qodir tadqiqotchilar darajasigacha chiqa olishga umid qilaman.

Savol: Kelajakda nimalarni rejalashtirayapsiz?

Luka Morgan: Men magistrlik diplomimni qo'lga kiritganimdan keyin fan nomzodi bo'lish uchun akademiyaga sayohatimni boshlamoqchiman, maqsadim professor bo'lish. Bu narsa aytishga oson. Bu maqsadga erishish uchun o'nlab yil kerak bo'lishiga men shubha qilmayman. Avval aytganimdek, men fanning eng oldi, ilg'or qismida tadqiqotga qodir bo'lishni istayman. Ammo, shu bilan birga, olimlarning keyingi avlodiga saboq berish mening yana bir orzuimdan biridir.

Savol: Talabalikning mustaqil hayotini boshlaganingizdan keyin uyingizni sog'inayapsizmi?

Luka Morgan: Oksfordda bir narsani boshlagandan keyin juda mashg'ul bo'lib qolasan, vaqt haddan ziyod tez o'tadi. Tahsilning har bir semestri sakkiz havtadan iborat. Shuning uchun ham biror narsaga ham vaqt qolmagandek tuyulaveradi. Shunday bo'lsa-da, men uyimni, oilamni sog'inishga vaqt topolayapman. Xayriyatki, Oksford shahri mening uyimdan avtomobilda uch-to'rt soatlik yo'l va semestr ichida ham ota-onamning meni kelib ko'rishga fursatlari bo'ldi.

Savol: Oksford haqida taassurotlaringiz qanday?

Luka Morgan: Oksfordda tahsil ola boshlaganimga uncha ko'p vaqt bo'lgani yo'q - faqat bir semestr o'qiganimga qaramasdan Oksford menda juda katta taassurot qoldirdi. Shaharning o'zi juda go'zal, tom ma'noda tarixga to'la. Bu erda aqlni shoshiradigan darajada ko'p turfa odamlar va faoliyatni uchratasiz. Oksford universitetida ta'lim sifati juda yuqori. Men qisqa vaqtning ichida juda ko'p narsani o'rgandim. Shuningdek, atrofingda ilm-fanga ashaddiy ishqiboz shuncha ko'p sondagi odamning bo'lishi juda zo'r. Bunday muhit odamni haqiqiy o'sish va rivojlanishga rag'batlantiradi. Universitetning mantiya kiyish va rasmiy kechki ovqat kabi shohona odatlari bor va ular odamlarning o'zaro muloqot qilishlari, yangi insonlar bilan tanishishlari maqsadida tashkil etilgan.

Savol: Siz O'zbekiston haqida nimalarni bilasiz?

Luka Morgan: O'zbekiston haqida men O'zbek do'stimdan ko'p narsa eshitganman. U Buyuk Ipak yo'lining qoq markazida joylashgan xushbo'y, serhosil yashil dalalariga, odam qadami etmagan joylari, hayratlantiradigan marmar haykallariga ega go'zal mamlakat. O'zbekistonning dengizdan ikki karra uzilib qolgani haqida eshitganman. Men uchun eng qiziq bo'lgani - bugungi kundagi O'zbekistonda tavallud topgan mutafakkir va algebra kashfiyotchisi Al-Xorazmiyning ilm-fan va matematika rivojiga qo'shgan hissasini bundan keyin hech kim hatlab o'tolmasligidir.

https://t.me/bbcuzbek

BBC.COM/UZBEK

Telegramda bog'lanish raqami +44 7858860002