Britaniyada o‘qish: Samarqandni va O'zbek futbol jamoasini 2026 yilgi Jahon chempionatida ko'rishni istaydigan Kembrij universiteti talabasi O'zbekiston Ta'lim Dunyo Yangiliklar

O'zbekiston hukumati oliy ta'limni dunyoning ilg'or universitetlari tartiblariga moslayapti, tobora ko'p sondagi O'zbek yoshlari jahonning eng oldi oliy o'quv muassasalari imtihonlaridan muvaffaqiyatli o'tib, nufuzli universitetlarda ta'lim olish imkoniyatini qo'lga kiritayaptilar.

Britaniya universitetlarida o'qish imkoniyatlarini izlayotganlar ham bor, shuning uchun ham biz Britaniya universitetlari va talabalari haqida maqolalar tayyorlashga qaror qildik.

Dunyoning eng yaxshi universitetlaridan biri

Kembrij universiteti Buyuk Britaniyaning eng qadimgi universitetlaridan biri - unga milodiy 1209 yili asos solingan.

U jahonning eng yaxshi universitetlaridan biri hisoblanadi.

Xuddi Oksforddek, Kembrij universiteti ham kichik kollejlarga bo'lingan, studentlar tahsil olayotgan vaqtlari ana shu erda yashaydilar.

Hozirgi paytda Kembrij universiteti kollejlari soni 31 ta.

Universitetni ko'plab taniqli insonlar bitirganlar.

Ular orasida Isaak Nyutonni, Charlz Darvinni, Stiven Xoking, Vladimir Nabokov va Alan Tyuringni sanab o'tish mumkin.

Nobel mukofoti sovrindorlaridan 121 nafarining nomi Kembrij bilan bog'langan.

Buyuk Britaniyaning 14 bosh vaziri Kembrijda tahsil olgan.

Hozir Kembrij universitetiga har yili 24 mingdan ortiq talaba qabul qilinadi.

Tarixan Kembrij universiteti matematika singari tabiiy fanlardagi izlanish va tadqiqotlar va bu sohalardagi olimlari bilan tanilgan.

Biroq oxirgi yillarda ijtimoiy fanlardagi diplomlar ham teng nufuzli ko'rila boshladi.

Kembrij universitetidagi kam sondagi kollejlar xotin-qizlar uchun ochiq bo'lgan, ularning eng birinchisi 1869 yili faoliyatini boshlagan Girton Kollejidir.

Uch kollej faqat ayollarni qabul qiladi, qolgan 28 kollejda o'gil-qizlar aralash o'qiydilar.

Bugungi suhbatdoshimiz Kembrij universitetining birinchi kurs talabasi Poli Kochi.

Kembrij universiteti talabasi Poli Kochi bilan suhbat

Сиз қаерликсиз?

Poli Kochi: Men London shahrining janubi-sharqida tug'ilganman. Biroq ota-onam Britaniyaga Albaniyadan kelishgan.

Savol: Universitetda nima o'rganayapsiz va nega?

Poli Kochi: Men Kembrij universitetida Inson, Ijtimoiy va Siyosiy fanlarni o'rganayapman. Bular siyosat, sotsiologiya va ijtimoiy antropologiyalarning qorishmasidir. Men universitetdagi sabog'imdan chindan ham huzurlanayapman. Оliy ta'limda ushbu yo'nalishni tanlaganimning sababi, mening haqiqatda jahonni, dunyodagi turfa jamiyatlarni yaqindan bilgim keladi.

Savol: Kelajakda nimalarni rejalashtirayapsiz?

Poli Kochi: Ayni paytda men bu borada bir qarorga kelganimcha yo'q. Men siyosatchi bo'lsammi yoki diplomatmi deb o'ylab turibman. Shu bilan birga huquqshunoslik ham menga qiziq tuyuladi.

Savol: Talabalikning mustaqil hayotini boshlaganingizdan keyin uyingizni sog'inayapsizmi?

Poli Kochi: Ba'zi paytlarda. Qiynalib turgan vaqting seni qo'llab-quvvatlashga tayyor oilang a'zolari bo'lgani qanday yaxshi. Uyim Kembrijga ancha yaqin bo'lgani uchun ba'zan universitet saboqlaridan charchagan paytim uyimga borib kelishim juda oson.

Savol: Kembrij universiteti haqida taassurotlaringiz qanday?

Poli Kochi: Kembrij ajoyib shahar va bu yerda yashash menga juda yoqayapti. Bu yerda hayot maromi Londondagiga solishtirganda ancha sekin, xotirjam. Bu erda talabalik hayoti ham zo'r. Bu erda kimni uchratgan bo'lsam, hammaning munosabati xushmuomala, do'stona. Atrofingda shuncha ko'p sonda go'zal tarixiy binolar borligi hayotni kam stress qilar ekan.

Savol: Kelajak haqida o'ylaganda sizni nima ko'proq tashvishlantiradi?

Poli Kochi: Shaxsan shu kecha-kunduzdagi o'y-tashvishlarimga to'xtaladigan bo'lsam, mustaqil bo'lib ota-onamning uyidan chiqib ketish meni hammasidan ham ko'ra ko'proq o'ylantiradi. Chunki Britaniyada uy narxlari tinimsiz ko'tarilib kelayapti. Siyosatni o'rganayotgan talaba sifatida hozirgi siyosatimizning ahvoli ham meni tashvishlantiradi. Bugun odamlarning haddan ziyod qarama-qarshi qutblarga bo'linganini ko'rish mumkin. Siyosiy bahslar haddan ziyod "zaharli" bo'lib borayapti, ayniqsa, Internet ijtimoiy tarmoqlarida. Odamlar bir-biri haqida kam qayg'uradigan bo'lib qolidilar. Kichkina xato uchun qattiq hukm chiqaradigan bo'lib qoldik. Shaxsan men bunday jamiyatda yashashni xohlamayman.

Savol: Siz O'zbekiston haqida nimalarni bilasiz?

Poli Kochi: O'zbekiston maftunkor mamlakat va men O'zbekistonning boy tarixga va boy me'morchilik an'analariga ega ekanini yaxshi bilaman. U uzoq asrlar mobaynida Xitoy bilan Evropa o'rtasidagi Buyuk Ipak yo'lining tarkibiy qismi bo'lgan. Mening afsonaviy Samarqandni borib ko'rgim keladi. Men algebrani kashf etgan buyuk olim Al-Xorazmiy O'zbekistonda tug'ilganini ham bilaman. O'zbekistonning juda yaxshi futbol jamoasini borligini bilaman va bu jamoani men 2026 yildagi futbol bo'yicha Jahon Kubogi o'yinlarida ko'rishni xohlardim.

https://t.me/bbcuzbek

BBC.COM/UZBEK

Telegramda bog'lanish raqami +44 7858860002