Озиш учун жарроҳлик қилдирган ёш она нега ўлди? Dunyo Yangiliklar

Озиш учун Туркияда операция қилдирган тўрт боланинг онаси бўлган аёл вафот этаркан, жарроҳлик амалиётлари қанчалик хавфли, деган саволлар яна ўртага чиқмоқда.

Озиш учун операция қилдиргани Туркияга борган ва амалиётдан сўнг вафот этган аёлнинг отаси Туркияга айни шу амалиёт учун бораётганларни эҳтиётликка чақирди.

Лондондеррилик Шеннон Минан Брауз август ойида вафот этганида 32 ёшда эди.

Тўрт боланинг онаси бўлган Шеннон 18 ой олдин ошқозонини операция қилдирганидан кейиноқ кўнгли айний бошлади, дейди унинг отаси.

Ше��н Минаннинг айтишича, операциядан кейин қизи овқат ея олмай қолган.

Унинг аҳволи шу қадар ёмонлашганги, қайд қилаверганидан унинг ҳатто тишлари чирий бошлаган.

Оиласига унинг Альтнагелвин шифохонасида ошқозонига озиш учун ўрнатилган боғ сабабли кам овқат ейишдан вафот этганини айтишган.

Ошқозонни тугиш жарроҳлик амалиёти қандай ўтказилади?

Бундай амалиётнинг иккита кенг тарқалган тури бор:

•Гастрэктомия, бунда ошқозоннинг бир қисми олиб ташланади ёки ҳазм қилиш тизими ошкозоннинг катта қисмидан узоқлаштирилади.

•Гастрик боғлам. Бунда ошқозоннинг ҳажмини қисқартириш учун у боғлаб қўйилади. Натижада одам оз овқат билан ҳам тўйиб қолаверади.

"Гастрэктомияда ошқозоннинг катта қисми кесиб ташланиб, унинг ҳажми кичрайтирилади," дейилади Миллий Соғлиқ хизмати вебсайтида.

"Бу аввалгидек кўп ея олмаслигингизни англатади, тез тўйиб қоласиз."

Бундай амалиётнинг хавфи шундаки, ютиш қийинлашиши, қайт қилиш, айрим ҳолатларда, жиддий касаллик ва ўлимга олиб бориши мумкин.

Алоқадор мавзулар:

Британиянинг етакчи бариатрик жарроҳларидан бири, профессор Дэвид Керриганнинг айтишича, одамлар озиш учун операция қилдиргани хорижга чиқиб "жуда катта хавфни" бўйнига олм��қдалар.

Унинг айтишича, Британияда бундай беморлар жиддий тайёрганликдан, ҳатто руҳий тайёргарликдан ўтказилади ва амалиётдан сўнг тикланиш учун дастур ҳам бор.

'Қалбим ва жонимни йўқотдим'

Март ойида ўтказилган Би-би-си суриштируви аниқлашича, озиш учун Туркияга операция қилдиргани борган британиялик етти киши амалиётдан сўнг вафот этган, бошқалари эса уйига жиддий соғлиқ муаммолари билан қайтган.

2019 йил Соғлиқни сақлаш вазирлиги Шимолий Ирландияда озиш операцияларига ихтисослашган биринчи марказни ташкил этиш режаланаётгани ҳақида маълумот берган эди.

Аммо марказни Эннискиллен шаҳрида очиш керакми ёки йўқлигини баҳолаш ишлари Ковид-19 пандемияси туфайли тўхтаб қолди.

Вазирликнинг билдиришича, иш қайта бошланишига бироз вақт керак бўлади.

Деррилик шифокор Никола Ҳеррон, Минан Брауз ва унинг оиласининг бошига тушган кўргилик "юракни эзиши"ни айтиб, Шимолий Ирландия шифокорлари жарроҳлик учун чет элга бораётганлардан тобора кўпроқ ташвишланяпти дейди.

"Бу ердаги шифокорлар баъзида четда бундай жиддий жарроҳлик амалиётини қилдириб келганларга қандай қарашга боши қотади, бу жуда ихтисослашган соҳа. Жуда хавотирли ҳолат", дейди доктор Ҳеррон.

Кўп одамлар бу амалиёт қанчалик жиддий эканини тушунмайди, дея қўшимча қилади у.

Жаноб Минаннинг Би-би-си Фойл радиосига қизининг ўлими унга ниҳоятда оғир бўлганини айтади.

"Болалари қолди. Шу болалар учун кучли бўлишимиз керак."

Қизи ҳақида эслар экан, жаноб Минан у витаминларини ҳам юта олмай қолганини айтади.

"Кунлар ўтиб, унинг аҳволи оғирлашгандан оғирлашиб бораверди."

Минаннинг айтишича, қизи қайд қилмай ейиши мумкин бўлган ягона таом тайёр лапшадан тайёрланган бульон эди.

"У ўзини жуда ёмон ҳис қиларди, чунки у фақат қайт қилар ва ухлар эди, шундан бошқа нарса қила олмай қолди", дейди у.

Отанинг айтишича, Минан Браузни шошилинч операция қилишга тўғри келган.

"Бизга тўйиб овқатланмаслик унинг жигарини ишдан чиқаргани ҳақида айтишди. Сўнг унинг аҳволи яна оғирлаша бошлади ва буйраклари ҳам ишламай қолди", дейди ота.

"Улар бизга қўнғироқ қилиб, қизим ўлиши мумкинлигини айтишди, улар чорасиз қолишди, қурилмаларни ўчиришдан бошқа йўллари қолмади."

Ҳозир у хорижга жарроҳлик амалиёти учун кетаётганларни етти ўйлаб бир кесишга чақириб, бу шунчаки "пулини тўлаб, ишни битказиб келса бўладиган" нарса эмаслигини айтмоқда.

Шенноннинг укаси ҳам озиш учун жарроҳлик амалиётидан ўтмоқчи бўлаётганлар "бир қарорга келишдан олдин, обдон ўрганиб, пухта текшириши" кераклигини айтмоқда.

"У касал бўлиб, уни бу аҳволда кўриш қанчалар оғирлигини ҳис қилганимизда одамларни бундай хавфдан огоҳлантириш кераклигини тушундик", дейди укаси Шенноннинг қабри ёнида туриб.

'Қатъий мезон'

Бундай амалиёт Британия Миллий Соғлиқ хизмати томонидан ўтказилса, қатъий мезонларга амал қилинади, дейди доктор Ҳеррон.

Бунинг уч��н беморнинг тана вазни индекси 40 дан юқори бўлиши, яъни ўта семиз бўлиши керак.

Ҳорижга бундай амалиёт учун бораётганларнинг аксариятида бу индекс баланд эмас, дейди доктор Ҳеррон.

"Шунинг учун ушбу амалиёт хавфи уларнинг соғлиғига фойдасидан кўра баланд бўлади."

Доктор Ҳеррон ҳам одамлар бунга қўл уришдан олдин жиддий ўйлаб кўришни маслаҳат беради.

https://t.me/bbcuzbek

BBC.COM/UZBEK

Telegramda bog'lanish raqami +44 7858860002